Буюк Британия Миллий Киберхавфсизлик Маркази (NCSC) Буюк Британия ташкилотлари ва йирик бизнесларини Украина ҳукумати ресурсларига ҳужумлар пайтида юзага келиши мумкин бўлган киберҳужумларга тайёр бўлишга чақирди.

Хусусан, марказ тизимдаги заифликларни тузатиш, маълумотларнинг захира нусхаларини текшириш ва киберҳужумлар хавфидан ҳимояланиш учун «кибергигиена» қоидаларига риоя қилишни тавсия қилди. Шу билан бирга, NCSC ҳеч қандай аниқ таҳдидлар ҳақида маълумотларга эга эмаслигини қайд этди.

Марказнинг таъкидлашича, Украинага қарши сўнгги киберҳужумлар ҳақидаги маълумотлар бу ҳодисалар 2017 йилдаги NotPetya вирус ҳужумлари ва Буюк Британия ҳукумати Россияга алоқадор хакерларни айблаган Грузияга қарши киберҳужумларга ўхшашлигини кўрсатади.

Январь ойи ўрталарида Украина ҳукумат веб-сайтларига сўнгги тўрт йил ичидаги энг йирик киберҳужум қилингани ҳақида хабар берганди. 

Орадан бир неча кун ўтиб, махсус алоқа ва ахборотни муҳофаза қилиш давлат хизмати шунга ўхшаш яна бир воқеа ҳақида хабар берди. Украина вазирлиги ва Рақамли трансформация қўмитаси ушбу киберҳужумга Россиянинг алоқадорлигини эълон қилди.