Европа Иттифоқи Озарбайжон билан газ етказиб беришни муҳокама қилади. Бу ҳақда Financial Times хабар берди.

Маълум қилинишича, Украинадаги вазият кескинлашган тақдирда Европа Иттифоқи Озарбайжон билан Европага газ етказиб бериш ҳажмини ошириш бўйича музокаралар олиб боради. Расмийлар Европа Иттифоқи газининг 40 фоиз импортига жавобгар Россия санкцияларга жавобан етказиб беришни қисқартириши мумкинлигидан хавотирда.

Европа энергетика бўйича комиссари Кадри Симсон келаси ой бошида Озарбайжонга ташриф буюради ва мамлакат энергетика ва табиий ресурслар вазирларидан ёрдам олиш умидида. Симсоннинг сўзларига кўра, у 7 февраль куни Вашингтонга Европа Иттифоқи-АҚШ Энергетика кенгашида энергия етказиб бериш бўйича кейинги муҳокамаларни ўтказиш учун боради.

АҚШ президенти Жо Байден ва Европа Комиссияси президенти Урсула фон дер Ляйен таъминотдаги узилишларнинг олдини олиш учун бутун дунё бўйлаб турли манбалардан Европа Иттифоқига табиий газни узлуксиз, етарли ва ўз вақтида етказиб беришни таъминлаш бўйича қўшма баёнот берган. Байден ва фон дер Ляйен АҚШ ва ЕИ Европага ёқилғи етказиб бериш масаласини қайси давлатлар билан муҳокама қилаётганига аниқлик киритмаган.

Еврокомиссия расмийси Брюссел Осиёнинг айрим давлатлари билан музокаралар олиб бораётганини қайд этди.

«Биз ҳар қандай етказиб берувчи билан алоқа ўрнатиш учун қўлимиздан келганини қиламиз», деган у.

Аввалроқ Европа омборларида сақланаётган газ ҳажми 40 фоиздан пастга тушгани хабар қилинганди. Шунингдек, АҚШ ва Қатар Европага газ етказиб бериш бўйича музокара ўтказгани айтилгани ҳақида хабар берилди.