Toyota 2021 йил дунё бўйича энг кўп автомобиль сотган компания бўлди. Бу ҳақда «Коммерсантъ» хабар берди.

Маълум қилинишича, Япониянинг Toyota автомобиль ишлаб чиқарувчиси 2021 йилдаги автомобиль савдоси бўйича ҳисоботини эълон қилган. Унга кўра, компаниянинг 2021 йилги савдоси 10,5 миллион донани ташкил этган.

Шу тариқа компания автомобиль савдоси бўйича дунёда биринчи ўринни сақлаб қолган. Германиянинг Volkswagen компанияси 8,9 миллион дона маҳсулот билан иккинчи ўринни эгаллаган.

Toyota компаниясининг йиллик ҳисоботида айтилишича, 2021 йили COVID-19 пандемиясининг салбий таъсири 2020 йилга нисбатан камроқ бўлган. Натижада, бутун дунё бўйлаб Toyota Motor моделларининг сотуви 10,5 миллион донани ташкил этган, бу 2020 йилга нисбатан 10,1 фоизга кўп.

Японияда Toyota савдоси 2,1 миллион, Япониядан ташқарида — 8,4 миллион автомобилни ташкил этган. Toyota Motor ишлаб чиқаришининг умумий ҳажми 10 миллион автомобилни ташкил этган, бу 2020 йилга нисбатан 9,4 фоизга кўпдир. Шундай қилиб, Toyota жаҳон автомобиль бозорида ўз етакчилигини сақлаб қолган, компания бу ўринга бир қанча вақт танаффусдан сўнг 2020 йил охирида қайтиб келганди.

Фақат Германиянинг Volkswagen концерни 2021 йилда глобал сотувлар ҳажми бўйича Toyota билан рақобатлаша олган. Бироқ, компания ҳисоботидан сўнг, бунинг эҳтимоли камайган: чипларни етказиб бериш билан боғлиқ давом этаётган муаммолар туфайли VW глобал сотуви 10 йиллик энг паст даражага тушиб, 8,9 миллион автомобилни ташкил этган.

Ўз навбатида, Toyota чип танқислиги таъсирини сезиларли даражада юмшатишга муваффақ бўлган, гарчи у декабрь ойида компонентлар етказиб беришдаги узилишлар ва яримўтказгичларнинг етарли даражада таъминланмаганлигининг салбий таъсири туфайли глобал жўнатмалар камайганини эътироф этган.

Япония компанияси, шунингдек, таъминот билан боғлиқ вазият ноаниқлигича қолаётгани, шу сабабдан ушбу салбий таъсирни минималлаштириш учун ҳаракат қилишда давом этишини таъкидлаган.

Қайд этилишича, 2021 йилда Renault-Nissan-Mitsubishi альянси 7,8 миллион автомобиль билан глобал автомобиль савдоси бўйича учинчи ўринни эгаллаган.

Toyota 2008 йилда биринчи марта сотувлар бўйича дунёдаги энг йирик автомобиль ишлаб чиқарувчиси бўлиб, тахминан 70 йил давомида етакчилик қилиб келган Америка концерни General Motors’ни биринчи ўриндан сиқиб чиқарганди. 2008 йилдан 2018 йилгача Toyota биринчи ўринни эгаллаб, 2011 йилда фақат бир марта GM’га ютқазган. Бироқ, 2018 йил натижаларига кўра, Volkswagen дунёдаги энг йирик автомобиль ишлаб чиқарувчисига айланган. Компания бунга Хитойдаги фаол сиёсати туфайли эришган.

Аввалроқ Toyota Япониядаги деярли барча заводларида ишлаб чиқаришни тўхтатгани хабар қилинганди. Шунингдек, Toyota Tacoma пикапининг янги версиясини тақдим этгани ҳақида хабар берилди.