Twitter’нинг Параг Агравал раҳбарлигидаги биринчи молиявий кўрсаткичлари таҳлилчилар кутганидан бироз ёмонроқ натижа кўрсатди. Бу ҳақда «Коммерсантъ» хабар берди.

Маълумотларга кўра, 2021 йилнинг тўртинчи чораги якунлари бўйича компания даромади 1,57 миллиард долларга етган. Бу кўрсаткич 2020 йилга нисбатан 22 фоизга юқори ва таҳлилчилар прогнозидан бироз орқада қолади (улар компания 1,58 миллиард доллар даромад олишини кутганди).

Компаниянинг чораклик даромади ҳар бир акция учун прогноз қилинган 0,35 долларга нисбатан 0,33 долларни ташкил этган. Кунлик фаол фойдаланувчилар сони эса уч ой ичида 211 миллиондан 217 миллионга кўпайган. Таҳлилчилар фаол фойдаланувчилар сони 218 миллионга етишини кутганди.

Бундан ташқари, Twitter 2020 йилдан бери амалда бўлган акцияларни қайтариб сотиб олиш дастурига ўзгартиришлар киритилганини эълон қилган эди. Ўшанда компания акциядорлардан 2 миллиард долларлик акцияларни сотиб олишга ваъда берган.

Айни дамда компания 819 миллион долларлик қимматли қоғозларни қайтариб сотиб олишга мажбур. Twitter раҳбарияти буни яқин ойларда амалга ошириш ниятида. Кейин яна 2 миллиард долларлик акцияларни сотиб олишни бошлайди.

Аввалроқ Twitter’нинг янги етакчиси компанияда қайта ташкил этиш ишларини бошлагани хабар қилинганди. Шунингдек, Twitter яна 3 та давлатда ёлғон маълумотлар ҳақида хабар бериш функциясини ёқиши ҳақида хабар берилди.