Twitter асосчиси ва собиқ бош директори Жек Дорсининг ўрнини эгаллаган Параг Агравал компанияда қайта ташкил этиш ишларини бошлади. Бу ҳақда Inc. нашри хабар берди.

«Twitter масъулият, тезкорлик ва операцион самарадорликни ошириш учун ишлаб чиқиш, маҳсулотларни бошқариш, дизайн ва тадқиқот бўйича барча асосий жамоаларни бошқарадиган бош менежерлар лавозимларини жорий қилмоқда», дейилади хабарда.

Қайд этилишича, компаниянинг маҳсулотлар бўлими собиқ раҳбари Кайвон Бейкпур истеъмолчилар билан ишлаш бўйича бош менежер, сотувлар бўлими бошлиғи Брюс Фальк даромадлар бўйича бош менежер, ривожланиш бўйича вице-президент Ник Колдуэлл эса асосий технологиялар бош менежери бўлади.

Бундан ташқари, стратегия ва операциялар бўйича катта директор Линдси Януччи штаб бошлиғи ва операциялар бўйича вице-президент лавозимига кўтарилган.

«Биз тез ҳаракат қилиш ва қарор қабул қилиш имкониятига эга бўлишни хоҳлаймиз ва Параг бунда етакчи ролни ўйнамоқда», — дейди корпоратив коммуникациялар бўлимининг янги раҳбари Лаура Ягерман.

Аввалроқ Twitter асосчиси Жек Дорси бош директор лавозимини тарк этгани ҳамда компания техник директори Параг Агравал унинг ўрнини эгаллагани хабар қилинганди. Шунингдек, Twitter акциялари Жек Дорси бошқаруви вақтида секин ўсгани маълум бўлганди.