Twitter яна 3 та давлатда ёлғон маълумотлар ҳақида хабар бериш функциясини ёқади
Компания аллақачон ёлғон хабарлар тўғрисида 3 миллионга яқин мурожаат олган.
Twitter яна 3 та мамлакатда фойдаланувчиларга ёлғон маълумотлар ҳақида хабар бериш имконини берувчи синов функциясини ишга туширади. Бу ҳақда Reuters хабар берди.
Twitter яна учта мамлакат — Бразилия, Испания ва Филиппиндаги фойдаланувчиларга твитлардаги ёлғон ва чалғитувчи маълумотлар ҳақида хабар бериш имкониятини очади. Бу хусусият ҳозирда бета-версияда ишламоқда ва аввал фақат АҚШ, Австралия ва Жанубий Корея аҳолиси учун мавжуд эди.
Компания нотўғри маълумотлар тарқалишига қарши курашиш хизматини 2021 йил август ойида ишга туширган. Twitter аллақачон хизмат қоидаларини бузган деб ҳисобланган постларни белгилаган фойдаланувчилар томонидан 3 миллиондан ортиқ мурожаат олган.
Бундан ташқари, 2021 йилда Twitter ўз аъзоларига ёлғон маълумот олиб юрувчи твитларда қайдлар ва қўшимча маълумотларни қолдириш имконини берувчи яна бир дастур яратган, бироқ бу қайдларнинг барчаси алоҳида сайтда сақланади.
Маълумот ўрнида, 2021 йилнинг ноябрида ҳаммуассис ва бош директор Жек Дорси компанияни тарк этганди. Компания раҳбарияти олти йил ичида биринчи марта ўзгарган. Дорси даврида Twitter акциялари 85 фоизга ошган. Дорсининг бойлиги 7,8 миллиард долларга баҳоланиб, у дунёдаги энг бой ишбилармонлар рўйхатида 337 ўринни эгаллаган.
Аввалроқ Twitter асосчисининг тўлов компанияси биткоин «қазиб олиш» тизимини яратиши хабар қилинганди. Шунингдек, Twitter TikTok’ка ўхшаш вертикал видео функциясини синовдан ўтказа бошлагани ҳақида хабар берилди.