Қозоғистонлик тадбиркор Маргулан Сейсембаев криптомайнинг ҳақида ўз фикрлари билан ўртоқлашди.

«Биринчидан, криптовалюталар ва блокчейн технологиясини аниқ ажратиб олиш керак. Мен блокчейн технологиясига мутлақо ишонаман. Менимча, бу келажакнинг жуда ажойиб технологияси», — дейди у.

Бироқ қозоғистонлик тадбиркор криптовалюталарга унчалик ишонмаслигини қўшимча қилган.

«Мен умуман олганда криптовалюталарга ишонаман. Ишончим комилки, улар келгусида жаҳон молия тизимида ўзларининг муносиб ўринларини эгаллайди. Лекин мен мавжуд криптовалюталарга унчалик ишонмайман. Нима демоқчиман? Биринчидан, давлатлар, Visa, Mastercard, American Express, йирик банклар каби йирик молиявий корпорациялар ва бошқалар ўзларининг рақамли пулларини яратишига ишонаман.

Улар буни қилгандан сўнг, биткоин, эфириум ва бошқалар каби тартибга солинмаган валюталарни «ўлдириш»ни бошлайди. Албатта, бу вақтга келиб, мавжуд криптовалюталар шунчалик кучли бўлиб кетиши мумкин-ки, уларни йўқ қилиб бўлмайди. Қолганини келажак кўрсатади. Лекин ҳозирча улардан узоқдаман», — дейди у.

Шунингдек, Маргулан Сейсембаев майнинг фермаларга муносабати ҳақида фикр билдирган.

«Майнинг фермаларига муносабатимга келсак, уларнинг ҳозирги ҳолатини ёмонлик деб ҳисоблайман. Биз минералларни электр энергиясини ишлаб чиқариш, атроф-муҳитни бузиш учун сарфлаймиз, кейин эса буларнинг барчаси криптовалютани қазиб олиш учун харажат қилинади. Ишонаманки, агар криптовалюталар келажагимизда муносиб ўрин эгаллашни истаса, улар биринчи навбатда экологик тоза иш технологиясига ўтиши керак», — дейди у.

Бундан ташқари, Маргулан Сейсембаев майнерларни «ифлос кончилар» деб ҳисоблашини маълум қилди.

«Мен майнерни оқ ва кулрангларга ажратмайман. Улар бизнинг экологиямизни бузадиган даражада энергия истеъмол қилар экан, мен учун улар ифлос кончилар бўлиб қолади», —дейди у.

Қайд этиш керакки, Козоғистон майнинг бўйича дунёда иккинчи ўринда туради.