Олтин нархи Украинадаги вазиятнинг кескинлашиши фонида ноябрдан бери рекорд даражага кўтарилди. Бу ҳақда Bloomberg хабар берди.

Қайд этилишича, олтин нархи мудофаа активларига талаб ортиши туфайли 2021 йил ноябридан бери энг юқори даражага кўтарилган. Қимматбаҳо металлга қизиқиш Украина атрофидаги вазият туфайли ортиб бораётган геосиёсий кескинликлар фонида ортган.

14 февраль куни олтин нархи 0,7 фоизга ошган ва кун давомидаги максимал кўрсаткичда унциясига 1871,05 долларни ташкил қилган. Тошкент вақти билан 22:50 ҳолатига кўра, олтин 1862,98 доллардан сотилган, яъни охирги савдо сессияси якунига кўра 0,23 фоизга ошган.

Таъкидланишича, Россия ва Украина ўртасидаги кескинлик, АҚШ Федерал захирасининг асосий фоиз ставкасини ошириши кутилаётганига қарамай, инвесторларнинг олтинга бўлган қизиқишини қайтарган.

«Бозорлар [геосиёсатга] мудофаа активларини излаш орқали муносабат билдирмоқда, бу эса қимматбаҳо металлни кучли қўллаб-қувватлайди», — деган ActivTrades катта таҳлилчиси Рикардо Евангелиста.

Украина атрофидаги вазият палладий ва алюминий нархига ҳам таъсир қилган, чунки Россия ушбу металларнинг дунёдаги асосий етказиб берувчиларидан бири ҳисобланади. Жумладан, 14 февраль куни палладий нархи 3,9 фоизга ошиб, унцияси 2398,25 долларни, алюминий 3,3 фоизга ошиб, метрик тоннаси учун 3241 долларни ташкил қилган.

Қайд этиш керакки, «қора олтин» — нефтнинг нархи ҳам ўсиб бормоқда. Хусусан, Brent маркали нефтнинг нархи бир баррель учун 94 доллардан, Urals маркали нефть нархи эса 93 доллардан ошган.

Таҳлилчиларнинг фикрича, таъминот учун хавф омиллари — Шарқий Европа ва Яқин Шарқдаги геосиёсий кескинлик нарх кўтарилишига таъсир қилмоқда.

Аввалроқ Morgan Stanley компанияси стратеги Майкл Уилсон Россиянинг Украинага эҳтимолий бостириб кириши энергия нархининг кескин кўтарилиши туфайли бир вақтнинг ўзида бир нечта мамлакатларда таназзулга олиб келиши мумкинлигини айтган эди. Инвестицион банк таҳлилчиси жанговар ҳаракатлар авж олишининг иқтисодиёт ва даромадларга таъсирини «қутб бўрони» билан таққослаган, энергетика компаниялари акциялари энг катта тушиш хавфи остида бўлишини таъкидлаган.

Россия қўшни давлат ҳудудига бостириб кириш режаларини бир неча бор рад этган. 14 февраль куни Президент Владимир Путин Россия ташқи ишлар вазири Сергей Лавров ва мудофаа вазири Сергей Шойгу билан учрашувлар ўтказган, унда асосий урғу кескинликни юмшатиш ва Украина инқирозига дипломатик ечим топишга қаратилган.