Россиянинг 2021 йилги нохомашё маҳсулотлар экспорти рекордни янгилади ва 193 миллиард долларга етди, бу ўтган йилга нисбатан 37 фоизга кўпдир. Бу ҳақда Дубайдаги «ЭКСПО-2020» кўргазмаси арафасида Россия экспорт маркази бош директори Вероника Никишина маълум қилди.

«Ўтган йили биз экспортнинг барқарор ўсишини қайд этдик. Экспортнинг умумий ҳажми қарийб 492 миллиард долларни ташкил этди, бу 2014 йилнинг рекорд даражасини деярли такрорлайди. Экспорт таркибида нохомашё товарлари доимий равишда хомашёдан ошиб бормоқда, ўтган йилда уларнинг улуши қарийб 64 фоизни ташкил этди», — дейди у.

Таъкидланишича, 2021 йилда нохомашё ва ноенергетик маҳсулотлар экспорти ҳар ой рекордларни янгилаган. Хусусан, декабрь ойида энг юқори натижа қайд этилиб, экспорт 22,8 миллиард долларни ташкил этган. 2021 йил охирида у 193 миллиард долларга етган, бу 2020 йилга нисбатан 37 фоизга кўпдир.

Экспортнинг асосий товарлари металл маҳсулотлари (25,6 фоиз), кимёвий маҳсулотлар (19,6 фоиз), машинасозлик маҳсулотлари (19,1 фоиз) ва озиқ-овқат (17,7 фоиз) ҳисобланади. Россия товарларининг асосий истеъмолчилари Хитой, Қозоғистон, Беларусь, Туркия ва АҚШдир.

Аввалроқ Россия иқтисодиёти 11 йиллик пасайишдан сўнг 2021 йил ўсиш қайд этгани хабар қилинганди.