Ўзбекистонда Фарғона, Самарқанд, Андижон, Жиззах ва Тошкент вилоятлари ўзини ўзи банд қилган фуқаролар сони бўйича етакчилик қилмоқда. Бу ҳақда Давлат солиқ хизматининг матбуот хизмати хабар берди.

Маълум қилинишича, Ўзбекистонда 2022 йил 16 февраль ҳолатига ўзини ўзи банд қилганлар 1 миллион 324 минг 31 нафарга етган. 2022 йил 1 январдан 16 февралга қадар 132 минг 47 нафар фуқаро ўзини ўзи банд қилган шахс сифатида рўйхатдан ўтган.

Бу борада Фарғона (20 минг 295), Самарқанд (18 минг 988), Андижон (13 минг 901), Жиззах (10 минг 647) ва Тошкент вилоятлари (10 минг 362) етакчилик қилмоқда.

Қайд этилишича, ўзини ўзи банд қилганларнинг тармоқлар кесимида тақсимланиши қуйидагича:

• қишлоқ хўжалиги йўналиши бўйича 50 минг 691 нафар;
• саноат йўналиши бўйича 32 минг 707 нафар;
• маиший хизматлар бўйича 23 минг 641 нафар;
• ижтимоий йўналиш бўйича 15 минг 183 нафар;
• халқ истеъмоли моллари ишлаб чиқариш ва хизматлар кўрсатиш бўйича 7551 нафар;
• ахборот-коммуникация йўналиши бўйича 2274 нафар.

Таъкидланишича, ўзини ўзи банд қилган шахслар бепул рўйхатдан ўтади, иш берувчига эга бўлмайди ва ишчи ёлламайди. Шунингдек, уларга меҳнат стажи ва пенсия ҳисобланади.

Бундан ташқари, ўзини ўзи банд қилганлар йилда бир марта БҲМнинг бир баравари миқдорида ихтиёрий равишда ижтимоий солиқ тўлайди. Шу билан бирга, даромадидан солиқ тўламайди.

Шунингдек, улар юридик шахслардан пул ўтказмаларини қабул қилиш учун банкда ҳисобрақам очиши мумкин. Ўзини ўзи банд қилганлар фақат рухсат этилган фаолият турлари билан шуғулланади. Улар шуғулланиши мумкин бўлган фаолият турлари ушбу рўйхатда келтирилган.

Аввалроқ Президент бандлик ва маҳаллабай тизим бўйича йиғилиш ўтказгани хабар қилинганди.