«ВКонтакте» (VK) интернет-компанияси директорлар кенгашининг беш нафар аъзоси кетганини эълон қилди. Бу ҳақда «Интерфакс» хабар берди.

Гап Жако Ван Дер Мерве, Чарльз Сирл ва Марк Ремон Сорор ҳақида бормоқда — улар 4 март куни VK директорлар кенгашининг ижрочи бўлмаган аъзолари лавозимларини тарк этиш тўғрисида қарор қабул қилган. Уларнинг барчаси VK директорлар кенгашидаги Naspers вакиллари эди.

Таъкидланишича, яна икки мустақил директор — Ян Буне ва Сан Хун Ким 7 март куни кенгашдаги ўз лавозимларини тарк этади.

«Метю Ҳаммонд VK бошқарувчи директори ва бош молиявий директори лавозимини тарк этади», дейилади интернет компанияси баёнотида.

Ҳаммонд 2011 йилда интернет компаниясининг бошқарувчи директори, 2013 йилда молия директори этиб тайинланганди.

«VK аввалгидек ишлашда давом этмоқда. Компания яқин келажакда янги тайинловлар ҳақида эълон қилади, — деган компания бош директори Владимир Кириенко.

Таъкидланишича, Naspers компаниянинг акциядори бўлишда давом этади.

VK директорлар кенгашида беш киши қолмоқда: компания ҳаммуассиси Дмитрий Гришин, «Газпром-Медиа Ҳолдинг» (ГПМ) юридик дирекцияси раҳбари Дмитрий Чудаков, «СОГАЗ» бошқаруви раиси Антон Устинов, «Газпром» бошқаруви матбуот котиби ва ГПМ директорлар кенгаши аъзоси Сергей Куприянов, «МФ Technologies» (МФТ) бош директори Ульяна Антонова.

Чудаков, Устинов ва Куприянов МФТ акциядорлари ўзгаргандан сўнг VK директорлар кенгашига қўшилган. МФТ компаниянинг 4,8 фоиз иқтисодий ва 57,3 фоиз овоз берувчи улушига эгалик қилади.

Қайд этилишича, 2021 йил охирида USM ва «Сбербанк» МФТ акциядорларини тарк этган, «СОГАЗ» ва ГПМ компаниянинг янги эгаларига айланган (уларнинг ҳар бири МТФнинг 45 фоиз улушига эгалик қилади); яна 10 фоиз улуш «Ростех»га тегишли.

МТФдан ташқари, Naspers тузилмаси — Prosus (25,7 фоиз иқтисодий ва 12,3 фоиз овоз берувчи улуш), Alibaba Group (9,5 ва 4,5 фоиз), Tencent (7 ва 3,3 фоиз) ҳам VK акциядорлари ҳисобланади.

Аввалроқ Владимир Кириенко VK бош директори бўлгани хабар қилинганди. Шунингдек, миллиардер Фарҳод Мошири Алишер Усмоновнинг USM ҳолдинги директорлар кенгашидан кетгани ҳақида хабар берилди.