Лондон металл биржасида (LME) никель нархи 8 март куни эрталаб биринчи марта бир тоннаси учун 100 минг доллардан ошди. Бу ҳақда Bloomberg хабар берди.

Маълум қилинишича, энг юқори чўққисида, уч ой ичида етказиб бериш билан никель нархи 111 фоизга ошган. 1 тонна металл нархи 101 минг 365 долларга етган.

Кейинчалик никель нархининг кўтарилиши пасайди. LME маълумотларига кўра, металл нархи 70,88 фоизга ошиб, 1 тоннаси учун 82 минг 150 долларни ташкил этди.

Қайд этилишича, никель нархи «мисли кўрилмаган» даражада кўтарилган. Агар сўнгги беш йил ичида 1 тонна металл нархи 11 минг долларга ошган бўлса, жорий ҳафтада у дарҳол 72 минг долларга кўтарилди.

«Бу жараёнга ақл бовар қилмайди ва ҳеч қандай саноат асосларини акс эттирмайди. LME савдо тизими назоратдан чиқиб кетган ва аралашувни талаб қилади, акс ҳолда ‘юқумлилик’ бошқа металларга тарқалиши мумкин», деди Yonggang Resources савдо бўлими бошлиғи Цзян Ханг.

Таъкидланишича, Россия дунёдаги энг юқори сифатли никелнинг 17 фоизини ишлаб чиқаради. Аммо никель Россия ва Украина ўртасидаги можаро авж олишидан олдин ҳам чекланган етказиб бериш туфайли қимматлаша бошлаган ҳамда бу металлнинг катта тақчиллигидан қўрқишни кучайтирган.

Дунёдаги энг йирик никель ишлаб чиқарувчилардан бири, Россиянинг «Норникель» компаниясининг деярли 35 фоиз улуши миллиардер Владимир Потанинга тегишли (бойлиги 21,9 миллиард доллар). «Норникель»нинг деярли 28 фоизига миллиардер Олег Дерипаска (бойлиги 2,6 миллиард доллар) томонидан асос солинган UC Rusal компанияси эгалик қилади.

Аввалроқ Европада газ нархи рекорд даражада кўтарилгани хабар қилинганди. Шунингдек, Ўзбекистон товар-хом ашё биржасида цемент нархи кўтарилгани ҳақида хабар берилди.