Шавкат Мирзиёев импорт маҳсулотларни Ўзбекистонда ишлаб чиқариш устувор йўналиш бўлиши кераклигини таъкидлади. Бу ҳақда Президент раислигидаги саноат кооперациясини ривожлантириш ва ишлаб чиқаришни маҳаллийлаштириш юзасидан йиғилишда маълум қилинди.

«Бугунги ўзгарувчан шароитда иқтисодиётимизнинг барқарор ўсишини таъминлашнинг энг самарали йўли — ички имкониятларни ишга солиш, яъни импорт бўлаётган тайёр маҳсулотларни ўзимизда ишлаб чиқариш ва маҳаллий саноатни янада ривожлантиришдан иборат. Бу миллий иқтисодиётимизнинг устувор йўналиши бўлиши керак», — деди давлат раҳбари.

Президентнинг сўзларига кўра, буни ўйламаган, атрофдаги вазиятдан бехабар, сиёсатни тушунмайдиган ҳоким ёки тармоқ раҳбарининг ишлашга ҳаққи йўқ.

Шунингдек, йиғилишда 37 триллион сўмлик янги маҳсулот ишлаб чиқариш бўйича 2022–2023 йиллар учун 2,5 мингта лойиҳани ишга тушириш бўйича қабул қилинган дастурнинг аниқ ижросини сўраш вақти келгани қайд этилди.

Президент кўп тармоқ ва ҳудуд раҳбарлари бу масалада ҳали дунёқарашини ўзгартирмагани, ҳозирги вазиятдан хулоса чиқармаётганини танқид қилди.

Аввалроқ Президент Шавкат Мирзиёев электромобиль ишлаб чиқариш бўйича амалий ишларни ҳозирдан бошлаш кераклигини айтгани хабар қилинганди. Шунингдек, маҳсулот ишлаб чиқариш ва саноат кооперациясини кенгайтириш дастури қабул қилингани ҳақида хабар берилди.