Ўзбекистонда «Ёш ватандошлар реестри» ишга туширилади. Бу ҳақда Адлия вазирлигининг Huquqiy axborot канали хабар берди.

Маълум қилинишича, «Давлат органлари ва ташкилотларида меҳнат фаолиятини олиб бораётган ёш мутахассислар ва ёш ватандошларга зарур шарт-шароитлар яратиш чора-тадбирлари тўғрисида»ги ҳукумат қарори қабул қилинган.

Қарорга мувофиқ, 2022 йил июндан хориждаги нуфузли ОТМда ўқиётган, етакчи компанияларда ишлаётган Ўзбекистон ёшлари (ёш ватандошлар)га вазирликлар, идоралар ва ташкилотларда ишлаши учун шарт-шароит яратиш мақсадида ёш ватандошлар фаолияти давомида хизмат турар жойлари билан таъминланади.

Шунингдек, давлат органлари ва ташкилотларида камида 2 йил ишлаган ёш ватандошларга уй-жой учун ипотека кредитининг дастлабки бадали ва фоизларнинг бир қисмини қоплашга субсидия берилади.

Қайд этилишича, 2022 йил 1 июнгача «Ёш ватандошлар реестри» электрон тизими ишга туширилиб, мазкур тизим хориждаги ватандош олимлар, экспертлар ва тадқиқотчилар очиқ рўйхатдан ўтадиган платформага интеграция қилинади.

Таъкидланишича, ҳар йили 1 мартгача давлат органлари ва ташкилотлари тизимидаги малакали ёш мутахассислар ва ёш ватандошларни келгусида юқори лавозимга тайинлаш бўйича асосланган таклифларни Ёшлар ишлари агентлигига беради.

Агентлик 1 апрелгача таклифларни ўрганиб Президент Администрациясига тавсия киритади.

Аввалроқ Ўзбекистонда ёш тадбиркорларни қўллаб-қувватлаш учун 10 миллиард сўмгача грант ажратилиши хабар қилинганди. Шунингдек, Хорижий ОТМларни тамомлаган ёшларнинг маошига қўшимча устама тўланиши ҳақида хабар берилди.