Хорижий ОТМларни тамомлаган ёшларнинг маошига қўшимча устама тўланади
Устамалар рейтинг ташкилотларининг юқори 500 талик рўйхатига киритилган ОТМлар битирувчиларига тақдим этилади.
Ўзбекистонда хорижий ОТМларни тамомлаган ёшларнинг маошига қўшимча устама тўланади. АОКАда ўтказилган брифингда Президент ҳузуридаги Давлат хизматини ривожлантириш агентлиги масъул ходими Абдураҳмон Умаров устамалар тўлаш тартиби юзасидан маълумот берди.
Маълум қилинишича, хориждаги нуфузли олий таълим муассасаларида таълим олаётган, илм-фан билан шуғулланаётган, етакчи компанияларда ишлаётган ҳамда юксак билим ва малакага эга бўлган ёшларнинг Ўзбекистонга келиб ишлаши учун зарур шарт-шароит яратиш, уларга уй-жой ажратиш, муносиб маош тўлаш бўйича янги тизим жорий этилмоқда.
Хусусан, Президентнинг 2021 йил 13 июлдаги «Ёшларни ҳар томонлама қўллаб-қувватлаш ва уларнинг ижтимоий фаоллигини янада оширишга оид қўшимча чора-тадбирлар тўғрисида»ги фармони шу мақсадда эълон қилинган.
Мазкур фармоннинг 5-бандида давлат органлари, ташкилот ва муассасаларида фаолият кўрсатаётган нуфузли халқаро рейтинг ташкилотларининг юқори 500 талик рўйхатига киритилган хорижий олий таълим муассасаларини (бакалавриат, магистратура) тамомлаган ёки уларда илмий даража (PhD ва унга тенглаштирилган бошқа илмий даража) олган ёш мутахассисларнинг лавозим маошига Давлат бюджети маблағлари ҳисобидан қўшимча устамалар тўлаб бориш тартиби жорий этилган.
Фармон билан белгиланган қўшимча устамалар Давлат хизматини ривожлантириш агентлиги, ёш мутахассис ва унинг иш берувчиси ўртасида имзоланган шартнома асосида ҳар ой тўлаб борилади. Шартнома 3 йилгача бўлган муддатга тузилади ва тўловлар иш берувчи томонидан амалга оширилади.
Фармонга мувофиқ, Давлат хизматини ривожлантириш агентлиги томонидан ойлик устамалар татбиқ этиладиган таълим йўналишлари, тор мутахассисликлар рўйхати, давлат органлари, ташкилот ва муассасалари рўйхати шакллантирилиб, агентликнинг расмий веб-сайтига жойлаштирилган.
Таъкидланишича, Quacquarelli Symonds World University Rankings, Times Нigher Education, Academic Ranking of World University халқаро эътироф этилган рейтинг берувчи ташкилотлар ҳисобланади.
Ушбу рейтингларда эълон қилинган университетлар рўйхати Таълим сифатини назорат қилиш давлат инспекциясининг расмий веб-сайтида жойлаштирилган.
Қайд этилишича, устамалар миқдори қуйидаги жадвалда кўрсатилган тартибда белгиланади:
Аввалроқ Ҳоким ёрдамчилари фаолиятини қўллаб-қувватлаш жамғармасидан фойдаланиш тартиби белгилангани хабар қилинганди. Шунингдек, Ўзбекистонда ёш тадбиркорларни қўллаб-қувватлаш учун 10 миллиард сўмгача грант ажратилиши ҳақида хабар берилди.