Евроҳудудда катта эҳтимол билан иқтисодий пасайиш кузатилиши маълум қилинди
Bloomberg агентлиги 60 фоиз эҳтимол билан кейинги 12 ойда евроҳудудда иқтисодий пасайиш кузатилишини қайд этди. Рецессия хавфи 2020 йил ноябридан бери энг юқори бўлиб турибди.
Bloomberg агентлиги кейинги 12 ой ичида евроҳудудда иқтисодий пасайиш 60 фоиз эҳтимол билан юз беришини маълум қилди.
Агентлик маълумотларига кўра, евроҳудудда рецессия хавфи 2020 йил ноябридан бери энг юқори кўрсаткич сифатида баҳоланган. Иқтисодчиларнинг таъкидлашича, Европа Иттифоқининг энг йирик иқтисодиёти бўлган Германияда шу чоракнинг ўзида турғунлик бошланиши мумкин.
Қайд этилишича, иқтисодий вазиятнинг ёмонлашиши ва нархларнинг ошиши Россиядан электр энергиясини етказиб бериш билан боғлиқ муаммолар, шунингдек, Европанинг бир қатор давлатларида қурғоқчилик юз бериши фонида юзага келган.
Бундан ташқари, ҳозирги вазият евроҳудудда инфляциянинг ошишига олиб келиши айтилган. Иқтисодчилар 2022 йилда кўрсаткич ўртача 8 фоиз атрофида бўлишини айтган ва бу Европа Марказий банкининг 4 фоизлик мўлжалидан икки баравар юқори дегани.
Аввалроқ Жаҳон банки Украинадаги уруш туфайли дунёда қашшоқлик даражаси ортишидан огоҳлантирганди. Унга кўра, Россиянинг Украинадаги уруши паст ва ўрта даромадли мамлакатларда қашшоқлик даражасининг ошишига олиб келиши, ўнлаб мамлакатларда қарз инқирозини келтириб чиқариши ва миллионлаб одамларнинг қашшоқлашишига сабаб бўлиши мумкин.
