Хоразм ва Бухоро ўртасидаги электр тармоғининг қурилиши учун 47,1 млн доллар кредит ажратилди
Лойиҳа електр таъминоти тизимининг қувватини оширишга ва тармоқ йўқотишларини камайтиришга ёрдам бериши кўзда тутилган
Европа тикланиш ва тараққиёт банки Ўзбекистонда янада ишончли ва барқарор электр узатиш тармоқларини қуриш учун «Ўзбекистон миллий электр тармоқлари» АЖга 47,1 миллион доллар кредит ажратди.
Маблағлар Хоразм ва Бухоро вилоятларининг Саримай ва Жанкелди қишлоқлари ўртасида янги электр тармоғи қурилишига ажратилди. Янги линия қурилаётган, умумий ўрнатилган қуввати 1 ГВтгача бўлган иккита шамол электр стансиясини миллий электр тармоғига улайди.
«Ўзбекистон нафақат Марказий Осиёдаги энг кўп аҳолига эга давлат, балки барқарор инфратузилма ечимларига муҳтож бўлган минтақадаги энг тез ривожланаётган иқтисодиётдир. Банкимиз бундай лойиҳаларни молиялаштириш орқали ушбу ўсишни қўллаб-қувватлашга тайёр», — дейди ЕТТБ биринчи вице-президенти Юрген Ригтеринк.
Электр тармоқларини кенгайтириш қайта тикланувчи энергия манбаларини Ўзбекистон энергетика тизимига янада интеграциялаш имконини беради ҳамда мавжуд электр узатиш линиялари юкини мувозанатлаш ва мамлакат шимоли ва жануби-ғарбий ҳудудларида энергия таъминотидаги муаммоларни ҳал қилишга ёрдам беради.
