Дунёнинг энг бой одами Илон Маск Украина учун тинчлик режасини таклиф қилишидан олдин Путин билан суҳбатлашганини рад этди. Миллиардернинг сўзларига кўра, у охирги марта 18 ой олдин Россия президенти билан гаплашган.

«Бу ёлғон. Тахминан 18 ой олдин Путин билан фақат бир марта гаплашдим. Гап коинот ҳақида эди», — деб жавоб берди Маск Россия президенти билан суҳбат ҳақидаги саволларга.

Аввалроқ Илон Маск Украинадаги урушни тўхтатиш бўйича тwитлар ёзишдан аввал шахсан Путин билан суҳбатлашган бўлиши мумкинлиги ҳақида хабарлар тарқалганди.

Бу ҳақда ўз обуначиларига тарқатма мактубида машҳур сиёсатшунос ва ёзувчи Ян Бреммер маълум қилган. Бреммернинг айтишича, Маск Россия президенти билан суҳбати ҳақида унга ўзи айтган. Шунингдек, Россия президенти Киев билан музокаралар ўтказишга тайёрлигини маълум қилган, бироқ фақат Россия шартларига кўра.

Бреммернинг сўзларига кўра, Путин Маскга «нима бўлишидан қатъий назар» бу мақсадларга эришилишини, жумладан, ядровий зарба бериш эҳтимоли борлигини ҳам айтган.

Тадбиркор Twitter’да Украинадаги урушни тўхтатиш учун ўз таклифларини бериб сўровнома бошлаганидан сўнг Tesla компанияси акциялари қиймати 9 фоизга тушиб кетганди.

Маълумот учун, Илон Маск «Forbes» журнали талқинига кўра, АҚШнинг 400 та энг бой бизнесменлари рейтингида 251 миллиард доллар маблағ билан биринчи ўринни эгаллаганди. Бу ўтган йилга нисбатан (190,5 миллиард) 60,5 миллиард долларга (32 фоиз) кўпдир.

Аввалроқ Илон Маск Twitter’ни сотиб олишни Путиннинг нутқи туфайли секинлаштирган бўлиши мумкинлиги ҳақида хабар қилинганди.