Тошкентда 1 декабрь куни ТХТЯ доирасида «Марказий Осиё ва ундан ташқарида яшил туризм» конференцияси бўлиб ўтди. Бу ҳақда Kommers.uz мухбири хабар берди.

Мазкур тадбирда ҳукумат институтлари вакиллари, Европа Иттифоқи ва ташқи ҳамкорлар, яшил иқтисодиёт ва туризм секторида минтақа бўйлаб ва чет элдан манфаатдор томонлар, ACTED туризм дастурини амалга ошириш бўйича ҳамкорлар, Туризм ҳамжамияти ассоциациялари вакиллари ва қайта тикланадиган энергия манбалари энергетика сектори вакиллари иштирок этди.

Тадбирни туризм ва маданий мерос вазири ўринбосари Нусратилла Зикриллаев кириш сўзи билан очиб берди.

«Ўйлаймизки, мазкур ташаббусларни амалга ошириш орқали атроф-муҳит ва табиий ҳудудларга минимал салбий таъсир кўрсатган ҳолда туризмнинг уйғун ва барқарор ривожланишни таъминлайди, шунингдек, жамият, иқтисодиёт, маданиятнинг барқарор ривожланишини таъминлайди, мамлакатимизда туризм соҳасида янги иш ўринлари яратилади. Биз бу йўналишда фаол ишлаяпмиз», — деди Нусратилла Зикриллаев.

Тожикистон ҳукумати ҳузуридаги Туризмни ривожлантириш қўмитаси раиси Тожидин Жўразода ҳам сўзга чиқди.

«Туризм нафақат иқтисодиёт ривожига ҳисса қўшади, балки ўзаро ҳамкорлик, билим алмашиш, технологиялар алмашинуви ҳамда барқарорлик билан боғлиқ масалалар ҳамдир. Туризм биринчи навбатда хавфсизлик тушунчасидир, чунки турист асосан хавфсиз ҳудудга саёҳат қилади. Мазкур тадбир бизни катта ғайрат билан тезроқ ҳаракат қилиш учун қўшимча куч берди», — деди у.

ACTED Ўзбекистондаги ваколатхонаси раҳбари Дилфуза Зокирова Марказий Осиёда яшил туризм мавзусини минтақадаги энг муҳим мавзулардан бири деб атади.

Ушбу анжуман Европа Иттифоқининг Switch-Asia лойиҳаси доирасида молиялаштириладиган ва Марказий Осиёнинг учта давлати: Тожикистон, Ўзбекистон ва Қирғизистонда амалга оширилаётган Туризм учун барқарор энергия лойиҳаси доирасида ташкил этилган.