Боку шаҳрида бўлиб турган Ўзбекистон Республикаси Бош вазирининг ўринбосари – инвестициялар ва ташқи савдо вазири Жамшид Ходжаев Озарбайжон Республикаси Бош вазирининг ўринбосари Шаҳин Мустафоев билан учрашув ўтказди. Бу ҳақда «Дунё» АА хабар берди.

Инвестициялар ва ташқи савдо вазирлиги маълумотига кўра, икки мамлакатнинг асосий вазирлик ва идоралари раҳбарлари ҳам иштирок этган учрашувда инвестициявий, савдо ва саноат кооперацияси соҳасидаги икки томонлама ҳамкорликнинг кенг кун тартиби кўриб чиқилган.

Учрашув аввалида томонлар икки томонлама муносабатлар ривожидаги ижобий динамикани ва Озарбайжон Республикаси Президенти Илҳом Алиевнинг жорий йил июнь ойида Ўзбекистон Республикасига буюрган давлат ташрифининг муҳим натижаларини ҳамда икки давлат ўртасидаги стратегик шерикликни чуқурлаштириш ва кенгайтиришга кучли туртки бўлганини қайд этдилар.

Учрашувда савдо алоқаларининг бугунги ҳолати ва ривожланиш истиқболлари кўриб чиқилди. Келгуси 5 йилда ўзаро товар айирбошлаш ҳажмини 1 миллиард долларга етказишга ўзаро тайёрлик билдирилиб, бу борада бир қатор аниқ амалий чора-тадбирлар келишиб олинган.

Икки томонлама муносабатларнинг истиқболли йўналишлари қаторида икки мамлакат ҳудудлари ўртасидаги тўғридан-тўғри алоқаларни кенгайтириш ҳам муҳим аҳамиятга эга эканлиги таъкидланди. Ишбилармонлар кенгашининг навбатдаги йиғилишини ҳамда истиқболли инвестиция лойиҳаларининг «роад-шоу»си билан бирга Ўзбекистон ва Озарбайжон ҳудудлари биринчи форумини 2023 йил бошида Тошкент шаҳрида ташкил этиш бўйича келишувга эришилган.

Суҳбат чоғида саноат кооперациясини чуқурлаштириш, яъни қўшма ипакчилик ва тўқимачилик кластерларини ташкил этиш, машинасозлик, кимё, нефть-кимё ва заргарлик саноати, энергетика, қишлоқ хўжалиги ва бошқа соҳаларда қўшма инвестиция лойиҳаларини амалга ошириш юзасидан аниқ амалий чора-тадбирлар муҳокама қилинган.