Pavel Durov “Hamster Kombat” oʻyini boʻyicha yangilikni eʼlon qildi
Durov “Hamster Kombat” mini ilovasida bor yoʻgʻi 3 oyning ichida 239 million kishi roʻyxatdan oʻtganini taʼkidladi. Hozirda ushbu oʻyinning kunlik yangi obunachilari soni 3-4 millionni tashkil etmoqda.
Telegram asoschisi Pavel Durov “Hamster Kombat” oʻyini tez orada TON blokcheyniga token chiqarishini maʼlum qildi. Bu haqda u oʻzining Telegram kanalida yozdi.
Durovning taʼkidlashicha, “Hamster Kombat” soʻnggi paytlarda barcha muhokama qilayotgan internet fenomeniga aylanib, bor yoʻgʻi 3 oy ichida 239 million obunachi yigʻgan. Mini ilova 100 million obunachiga erishishi uchun esa 73 kun kifoya qilgan. Hozirda “Hamster Kombat”da har kun 3-4 million yangi obunachilar roʻyxatdan oʻtmoqda.
Durov, shuningdek, yana bir bor Telegram va TONda bu kabi mini ilovalarning katta toʻlqini kutilayotganini maʼlum qildi. Bundan avvalgi shunday oʻyinlardan biri Notcoin bir necha oy ichida 35 million faol foydalanuvchilarni yigʻgan hamda 2024-yilning 16-may kuni TON blokcheyniga token chiqarib, barcha kriptovalyutalarda roʻyxatga olingandi. Shundan soʻng, Notcoin savdo hajmi boʻyicha dunyoning top-10 kriptovalyutalaridan biriga aylangandi. Uning bozor kapitallashuvi esa 700 million AQSH dollariga yetgan.
