Turkiyalik mutaxassislar O‘zbekiston tibbiyotini transformatsiya qilish bo‘yicha ishlashmoqda
O‘zbekiston Sog‘liqni saqlash vazirligi tomonidan tashkil etilgan ekspertlar guruhi, Turkiyadan jalb qilingan yettita mutaxassis bilan birgalikda, mamlakat tibbiyot tizimini transformatsiya qilish borasida ish olib bormoqda. Ushbu tashabbus, Prezident Shavkat Mirziyoyevning sog‘liqni saqlash tizimining jahon standartlari darajasiga ko‘tarish bo‘yicha qo‘ygan vazifalari doirasida amalga oshirilmoqda.
Hozirda O‘zbekistonda sog‘liqni saqlash tizimini yaxshilashga qaratilgan keng ko‘lamli transformatsiya jarayonlari davom etmoqda. Bu jarayonni muvaffaqiyatli amalga oshirish uchun xalqaro tajribalarni o‘rganish va amaliyotda samarali tatbiq etish talab qilinadi. Shu maqsadda, Turkiyadan kelgan mutaxassislar guruhi O‘zbekistonning barcha darajadagi tibbiyot muassasalarini o‘rganib, hududlarga tashrif buyurib, ularning faoliyatini tahlil qilmoqda.Bu haqda Sog‘liqni saqlash vazirligi matbuot xizmati xabar berdi.
Ekspertlar guruhi tibbiyot sohasidagi yettita asosiy yo‘nalish bo‘yicha ish olib bormoqda:
1. Birlamchi tibbiy-sanitariya yordamini takomillashtirish;
2. Tibbiy sug‘urta tizimini joriy etish va tizimni raqamlashtirish;
3. Shifoxonalarda tibbiy xizmatlar samaradorligini oshirish;
4. Tibbiy xizmatlarni rejalashtirish;
5. Farmatsevtikani rivojlantirish va dori vositalari ta’minoti;
6. Tibbiy asbob-uskunalar samaradorligini oshirish;
7. Shoshilinch va tez tibbiy yordamni rivojlantirish.
Guruhi rahbari Hasan Chagil, 1986-yilda Istanbul universitetini tamomlab, Turkiyada tibbiyot sohasini transformatsiya qilish jarayonlarida bevosita ishtirok etgan. U 2003-2013 yillarda Turkiya tibbiy tizimini yangilashga katta hissa qo‘shgan. Ayni paytda, Hasan Chagil O‘zbekiston sog‘liqni saqlash tizimini transformatsiya qilish borasida tibbiy sug‘urta tizimini joriy etish yo‘nalishida faoliyat olib bormoqda.
Bundan tashqari, guruhda Mehmet Ugurlu, Talgan Kyuchyuk, Muhammet Yornek, Mehmet Ersoy, Hasan Bagdji va Mexmut Avdji kabi tibbiyot sohasida katta ilmiy salohiyatga va amaliy tajribaga ega mutaxassislar ham ishtirok etmoqda.
Ekspertlar hozirda O‘zbekistonning tibbiyot muassasalarini chuqur o‘rganib, so‘ngra tahlil va tavsiyalarni umumlashtirgan holda, sog‘liqni saqlash tizimini bosqichma-bosqich isloh qilish bo‘yicha qisqa, o‘rta va uzoq muddatli “Yo‘l xaritalari”ni ishlab chiqish va amalga oshirishni rejalashtirmoqda.
Eslatib o’tish joizki, Shavkat Mirziyoyevning 2024-yil 9-noyabrda sog‘liqni saqlash sohasi xodimlariga bag‘ishlab yo‘llagan tabrigida aholi salomatligiga e’tiborni kuchaytirish va inson qadrini oshirishga qaratilgan ishlar izchil davom etishi ta’kidlangan edi.
