Janubiy Koreyaning «Hyundai» kompaniyasi O‘zbekiston fuqarolarini ishga jalb qilishni rejalashtirmoqda. Bu haqda O‘zbekiston Migratsiya agentligi matbuot xizmati xabar berdi.

Shu yilning sentabr oyida imzolangan hamkorlik memorandumiga asosan, Koreyaning Ulsan shahri hokimligi va «Hyundai Heavy Industries» kompaniyasi vakillari bilan uchrashuv bo‘lib o‘tdi. Uchrashuvda, O‘zbekistonlik ishchilarga to‘g‘ridan-to‘g‘ri ishchi vizalarini berish masalasi muhokama qilindi. Ushbu loyiha doirasida o‘zbekistonliklar elektrotexnika, avtomobilsozlik, kemasozlik, neftni qayta ishlash, kimyo sanoati va neyron texnologiyalar kabi sohalarda ishga joylashtiriladi.

“Biz Koreya mehnat qonunchiligini to‘liq hurmat qilgan holda, O‘zbekiston fuqarolarini malakali ishchilarga aylantirishni maqsad qilganmiz. Shuningdek, biz O‘zbekistonga investitsiya kiritish va shu yo‘l bilan ish o‘rinlarini yaratishga tayyormiz”, — dedi Hyundai kompaniyasining xorijiy ishchilar bilan ishlash bo‘yicha vitse-prezidenti Kim Seong Hoon.

Loyihaga ko‘ra, Ulsan shahrida kasb-hunarga o‘qitish markazlari tashkil etilib, o‘zgaruvchan bozor talablariga mos mutaxassislar tayyorlanadi. Markazlarning tashkil etilishiga Ulsan shahar hokimligi va Hyundai Heavy Industries mablag‘lari jalb qilinadi. Agar loyiha muvaffaqiyatli bo‘lsa, kelajakda «Kia» va «Samsung» kabi yirik kompaniyalar ham o‘z ishchilarini jalb qilishni ko‘rib chiqishi mumkin.

Bundan tashqari, yaxshi natijalar ko‘rsatgan ishchilarga E-9 (noprofessional) vizasidan E-7 (professional) vizasiga o‘tish imkoniyati yaratiladi, bu esa ularga Koreyada cheklovlarsiz ishlash, o‘z oilalarini olib borish imkoniyatini taqdim etadi.

Farg‘ona viloyati hokimining birinchi o‘rinbosari Xabibjon Sirojitdinovning ta’kidlashicha, viloyatda Koreya kapitali bilan ishlayotgan 48 ta qo‘shma korxona faoliyat ko‘rsatmoqda. Ulsan shahrining «Hyundai Heavy Industries» kompaniyasi bilan o‘tkazilgan uchrashuvda viloyatda o‘quv markazlarini tashkil etish va malakali ishchilarni Koreyadagi ishlab chiqarish korxonalariga yuborish bo‘yicha masalalar muhokama qilindi.

Viloyat vakillari, shuningdek, Koreyadagi yuqori daromadli ish o‘rinlariga O‘zbekiston fuqarolarini qonuniy ravishda jo‘natish bo‘yicha o‘zaro fikr almashdilar. Bu yo‘nalishda hamkorlikni davom ettirishga kelishildi.

Avvalroq, JICA (Yaponiyaning Xalqaro Hamkorlik Agentligi) o‘zbekistonliklarni Yaponiyaga ishga jalb qilish bo‘yicha hamkorlikni boshlagan edi. Ular qurilish, xizmat ko‘rsatish va qishloq xo‘jaligi kabi sohalarda ishga jalb qilish uchun malakali ishchi va texnik stajorlik dasturlarini taqdim etgan.