«Adolat» partiyasi deputati propan narxining oshishiga qarshi tezkor choralar ko‘rilishini talab qildi
"Adolat" partiyasi fraksiyasi deputati Muhammad Valiyev, so‘nggi oylarda propan gazining narxi keskin oshgani bilan bog‘liq ravishda davlat organlariga murojaat yo‘lladi. Deputat, narxlarning oshishiga sabab bo‘lgan omillarni, bozordagi narx barqarorligini ta’minlash uchun qanday chora-tadbirlar ko‘rilayotganini va narx shakllanishining shaffofligini nazorat qilish borasidagi savollarni o'rtaga qo'ygan.
Partiya matbuot xizmati xabariga ko’ra, Valiyevning murojaatlari Energetika vazirligi, Raqobatni rivojlantirish va iste’molchilar huquqlarini himoya qilish qo‘mitasi hamda Bosh prokuraturaga yuborilgan. Deputatning fikriga ko‘ra, propan narxining oshishi aholining iqtisodiy holatiga salbiy ta’sir ko‘rsatib, ijtimoiy muammolarni keltirib chiqarmoqda.
Murojaatda, propan narxining oshishi faqatgina bozor mexanizmlarining shaffofligini ta’minlash zarurligini ko‘rsatibgina qolmay, balki kuz-qish mavsumida energiya resurslariga talabning ortishi tufayli logistika jarayonlarini optimallashtirish, narx shakllanishida shaffoflikni ta’minlash va noqonuniy amallarni oldini olish kabi dolzarb masalalarni hal qilishni taqozo etmoqda.
Deputatning savollarida quyidagi asosiy nuqtalar ko‘tarilgan:
– Kuz-qish mavsumida propan narxining keskin oshishining oldini olish uchun qanday choralar ko‘rilgan?
– Narxlarni barqarorlashtirish uchun qachon amaliy chora-tadbirlar ko‘riladi?
– Narx shakllanishi jarayonidagi shaffoflikni ta’minlash va sun’iy taqchillikka yo‘l qo‘ymaslik uchun qanday nazorat tizimi ishlab chiqilgan va nima sababdan bu tizim samarali ishlamayapti?
– Gaz narxlari bo‘yicha aholi va iste’molchilarni muntazam ravishda xabardor qilish uchun qanday ochiq manbalar orqali axborotlar berib borilmoqda?
Shuningdek, 1-noyabr – 5-noyabr kunlari birjadagi savdolar davomida propan narxi 8,81 million so‘mdan 10,19 million so‘mgacha oshdi, bu esa yillik hisobda 44,7 foizga ko‘tarilgan. Energetika vaziri Jo‘rabek Mirzamahmudovning ta’kidlashicha, narxlarning oshishiga propanga bo‘lgan talabning ortishi, ishlab chiqarish hajmining yetarli bo‘lmasligi va propan gazining bozorga yetkazib berilishi bilan bog‘liq muammolar sabab bo‘lgan.
Bundan tashqari, Energetika vazirligi va Bosh prokuratura tomonidan olib borilgan tekshiruvlar natijasida 14,500 tonna propan gazining noqonuniy savdosi aniqlandi va unga chek qo‘yildi. Shu bilan birga, 6-noyabrdan boshlab narxlarning oshishiga cheklov kiritildi va birjadagi sotuvlarda boshlang‘ich narxga qo‘yiladigan ustama 20 foizdan oshmasligi belgilandi.
26-noyabr sanasiga ko’ra, propan narxi birja savdolarida 7,64 million so‘mga tushib, narxlarning pasayish jarayoni davom etdi.
