O‘zbekistonda «Shaffof shaharlar» va «Halol tumanlar» dasturlari ishga tushuriladi
O‘zbekistonda "Shaffof shaharlar" va "Halol tumanlar" dasturlari orqali davlat boshqaruvida shaffoflikni oshirishga qaratilgan yangi tashabbuslar boshlanmoqda. Loyihalar korrupsiyaning oldini olish va idoralarda halollikni ta’minlashga yo'naltirilgan bo‘lib, dastlab Toshkent, Jizzax va Buxoroda sinovdan o‘tkaziladi.
Korrupsiyaga qarshi kurashish agentligi xabariga ko’ra O‘zbekistonda korrupsiyaning oldini olish va uning oqibatlarini kamaytirish maqsadida yangi «Shaffof shaharlar» va «Halol tumanlar» loyihalari ishga tushiriladi. Bu tashabbus Korrupsiyaga qarshi kurashish agentligi va BMT Taraqqiyot dasturining hamkorligida amalga oshirilmoqda. Loyihalar, shuningdek, Yevropa Ittifoqi tomonidan moliyalashtirilayotgan «O‘zbekistonda korrupsiyaga qarshi kurashish bo‘yicha milliy ekotizimni mustahkamlash» dasturi doirasida tatbiq etiladi.
Dastlab, Toshkent shahrining Mirzo Ulug‘bek tumani, Jizzax shahri va Buxoro viloyatining Vobkent tumanlari bu yangi tizimni sinovdan o‘tkazish uchun tanlangan hududlar bo‘ladi. Ushbu dasturlar doirasida tashkilotlar va idoralar ichida korrupsiyaga oid har qanday salbiy holatlar bartaraf etiladi, shaffoflik va halollik yuqori darajaga ko‘tariladi.
«Shaffof shaharlar» va «Halol tumanlar» – bu atamalar korrupsiyaga qarshi kurashda axloqiy va shaffof standartlarni o‘rnatadigan maxsus hududlarni anglatadi. Markaziy va Sharqiy Yevropa hamda Janubi-Sharqiy Yevropa mamlakatlarida muvaffaqiyatli qo‘llanilgan metodologiya, O‘zbekistonning mahalliy hokimiyat organlarida ham joriy qilinishi kutilmoqda.
Agar dasturlar o‘z samarasini bersa, ular butun mamlakat bo‘ylab kengaytirilishi mumkin.
