O‘zbekiston Markaziy banki fuqarolarga beriladigan bank kartalari sonini tartibga solishni rejalashtirmoqda. 26-noyabrda o‘tkazilgan matbuot anjumani davomida Markaziy bankning regulyatori raisi o‘rinbosari Behzod Hamroyev bu haqda ma’lum qildi deb xabar berdi Spot. Uning so‘zlariga ko‘ra, hozirgi kunda O‘zbekistonda fuqarolar bir pasport asosida bir nechta bank kartalari ochishlari mumkin, ammo ba’zi hollarda bir shaxs 100 dan ortiq kartaga egalik qilmoqda.

Yangi tartib firibgarliklarning oldini olish va shubhali bank operatsiyalarini kamaytirish maqsadida ishlab chiqilgan. Bank kartalariga bo‘lgan talabni cheklash uchun bitta jismoniy shaxsga faqatgina 5 ta kartadan rasmiylashtirishga ruxsat berish, barcha banklarda esa bu cheklovni 20 tagacha belgilash ko‘zda tutilgan. Biroq, ushbu cheklovlar chet el valyutasidagi kartalar uchun amal qilmaydi.

Markaziy bank ma’lumotlariga ko‘ra, joriy yil 1-noyabr sanasida, O‘zbekistonda 54,9 million bank kartasi muomalada bo’lgan. Har bir fuqaro uchun o‘rtacha 1,5 tadan to’g’ri keladi. Shu bilan birga, hozirda kartalarga ega bo‘lgan shaxslarning 97 foizi 5 tagacha kartaga ega, 3 foizi esa 5 dan 20 tagacha kartalarni rasmiylashtirgan. Ba’zi foydalanuvchilarda esa 20 tadan ortiq kartalar mavjud bo‘lib,ular firibgarlik maqsadlarida foydalanilishga yo’l ochishi mumkin.

Shuningdek, O‘zbekistonda onlayn kredit olishda yuzaga kelgan firibgarlik holatlarining ko‘payishi sababli, 2024-yilning 1-noyabridan 2025-yilning 1-apreligacha banklar uchun onlayn kredit ajratish bo‘yicha vaqtinchalik tartib joriy etilgan. Kiberxavfsizlik markazi mutaxassisi Davron Abdullayevning ta’kidlashicha, kiberjinoyatlar ortishi aholi orasida moliyaviy savodxonlik yetishmasligi bilan bog‘liq.