“Dunyo” axborot agentligi matbuot xizmati xabariga ko’ra  25-28-noyabr kunlari Qoraqalpog’iston Jo’qorg’i Kengesi raisi Amanbay Orinbayev boshchiligidagi delegatsiya Janubiy Koreyada bo‘lib, “Koreya-Markaziy Osiyo” birinchi mintaqalararo forumida  ishtirok etdi. Mazkur forum doirasida muhim kelishuvlar imzolandi, ularning orasida qishloq xo’jaligi texnikalari ishlab chiqarish, IT-sohasini rivojlantirish, ekologik tiklanish va mehnat migratsiyasi masalalariga oid loyihalar mavjud.

Janubiy Koreyaning “KIDL Co., Ltd” kompaniyasi va “Shamchiroq To‘rtko‘l”  korxonasi o‘rtasida Qoraqalpog’iston tumanlarida yangi issiqxonalar tashkil etish va uskunalarini yetkazib berish bo‘yicha $62 millionlik kelishuv imzolandi. Ushbu loyiha orqali qishloq xo’jaligini modernizatsiya qilish, ekologik texnologiyalarni joriy etish va mahalliy ishlab chiqarishni rivojlantirish ko’zda tutilgan.

Shuningdek, Janubiy Koreya Eksim bankining EDCF fondi, Sukmyung ayollar universiteti va “Hyundai” tadqiqot instituti bilan xotin-qizlarni tadbirkorlikka o‘qitish va kasbga yo‘naltirish bo‘yicha “Ayollar o‘quv markazini tashkil etish” loyihasi amalga oshiriladi. Loyihaning umumiy qiymati $38 million bo‘lib, bu markazda xotin-qizlarga xizmat ko‘rsatish sohalari bo‘yicha kurslar o’qitiladi. Loyiha qamrovida, xotin-qizlarni tadbirkorlikka yo‘naltirish, kasbga o‘qitish va ularning iqtisodiy faoliyatga jalb etilishiga katta e’tibor qaratiladi. Qurilish uchun Nukus shahri hududidan yer maydoni ajratilishi belgilangan.

Tashrif doirasida, Janubiy Koreyaning “TYM” kompaniyasi prezidenti Kim Do Xun bilan qishloq xo‘jaligi texnikalarini ishlab chiqarish va texnik xodimlarni tayyorlash masalalari muhokama qilindi. Shuningdek, axborot texnologiyalari sohasida hamkorlikni kengaytirish maqsadida “Acryl” kompaniyasi rahbari Pak Ve Chin bilan IT-markazlarini barpo etish bo‘yicha kelishuvga erishildi. Koreya axborot texnologiyalari farovonligini oshirish agentligi tomonidan Qoraqalpog‘istonning o‘rta maktablariga zamonaviy kompyuterlar berildi.

Janubiy Koreya xalqaro hamkorlik agentligi (KOICA) bilan “Orol dengizi fojiasi oqibatlarini yumshatish, Orolbo‘yi mintaqasi uchun yashil tiklanish” loyihasi muhokama qilindi. Ushbu loyiha doirasida suv tejovchi texnologiyalar va tabiiy ofatlarga chidamli vositalarni joriy etish rejalashtirilgan. Yashil iqlim fondi bilan ham atrof-muhitni muhofaza qilish va ekologik toza texnologiyalarni joriy etish uchun grant mablag’larini jalb qilish imkoniyatlari ko‘rib chiqildi.

“People & Dream Co., Ltd.” kompaniyasi bilan mehnat migratsiyasi sohasida yaqin munosabatlar o‘rnatish va monomarkazlar tashkil etish bo‘yicha kelishuvlar imzolandi. Xorijga ishlash uchun ketayotgan fuqarolarni kasbga yo‘naltirish va xorijiy tillarga o‘qitish masalalari ham muhokama qilindi.

Eslatib o’tamiz, avvalroq, o‘zbekistonliklar Janubiy Koreyaning “Hyundai” kompaniyasiga ishga jalb qilinishi haqida xabar berilgan edi. Buning uchun kasb-hunarga o‘qitish markazlari tashkil etilib, malakali mutaxassislar tayyorlanadi.