Енгил автотранспорт воситаларида йўловчиларни шаҳар, шаҳар атрофи ва шаҳарлараро ташиш фаолияти ўзини ўзи банд қилган шахслар шуғулланиши мумкин бўлган фаолият турлари рўйхатига киритилади. Бунинг учун лицензия варақаси талаб этилади.

Аввал ўзини ўзи банд қилган шахслар сифатида йўловчи ташишга 2025 йил 1 январгача рухсат берилган эди.

Ўзини ўзи банд қилган шахсларнинг солиқ даври (йил) давомида меҳнат фаолияти натижасида ёки товарларни (хизматларни) реализация қилишдан олинган 100 миллион сўмгача бўлган даромадларига солиқ солинмайди. Бунда, йил тугаши билан янги йил бошидан даромадлар қайтадан ҳисобланади.

Солиқ даврида даромадлари 100 млн сўмдан ошганда якка тартибдаги тадбиркорлар учун белгиланган тартиб асосида солиққа тортилади.

Мисол учун, ўзини ўзи банд қилган таксистларнинг 2024 йилда даромади 100 миллион сўмдан ошган бўлса ҳам, 2025 йилда ҳисоб-китоб яна «нол»дан бошланади. 2025 йил давомида 100 миллион сўмгача бўлган даромад солиққа тортилмайди.

Шунингдек, такси фаолияти билан банд бўлганларга содда ва қулай бўлиши учун, даромади 100 миллион сўмдан ошганда (лекин 1 миллиард сўмгача) улар учун солиқни солиқ агентлари (такси агрегатори) тўлов манбаида автоматик ҳисоблаш ва буджетга ўтказиш юзасидан тегишли таклифлар ишлаб чиқилган. Мазкур таклиф қабул қилиниб, қонунчиликка кирилганида ушбу тартиб асосида солиққа тортиш тизими жорий этилади.

Маълумот учун, 2025 йил 1 февраль ҳолатига 736 минг нафар ўзини ўзи банд қилган шахслар йўловчи ташиш билан шуғулланади.