Қайд этилишича, ўтган йилда Ўзбекистон республика товар-хомашё биржасининг биржа савдолари орқали 2 912,1 килограмм олтин ва кумуш сотилган.

Шу жумладан, биржа орқали 2 535,1 килограмм олтин сотилган. Олтиннинг биржа котировкаси 1 грамм учун 977,5 минг сўмни ташкил этган. Кумушнинг сотилиш ҳажми 377 килограммга тенг бўлиб, унинг 1 грамм учун ўртача нархи 11 325,2 сўмга тенг бўлган.

2025 йил январь ойида биржа орқали тадбиркорлар томонидан 195,7 килограмм олтин сотиб олинган. Жорий йилнинг январь ойи учун 1 грамм олтиннинг ўртача нархи 1 122,2 минг сўмни ташкил этган.

Қимматбаҳо металларнинг бошланғич нархи Марказий банкнинг биржа битими тузилган санадаги курси бўйича миллий валютада Лондон қимматбаҳо металлар бозори уюшмасининг сўнгги тонгги фиксинги асосида белгиланади.

Ҳозирда олтиннинг 1 унцияси учун Лондоннинг қимматбаҳо металлар бозори уюшмасининг фиксинг нархи 2 931,9 АҚШ долларни белгилаган.

Маълумот учун, трой унцияси қимматбаҳо металлар савдосида асосий ўлчов бирлиги сифатида фойдаланилади. Бир трой унцияси 31,1 граммга тенг.

Биржа бозорида «Олмалиқ КМК» АЖ ва «Навоий КМК» АЖ қимматбаҳо металларни сотувчилари сифатида иштирок этмоқда. Саноатда ишлатиладиган маҳсулотларни қайта ишлаш қувватига эга бўлган ишлаб чиқарувчилар ҳамда заргарлик буюмлар ишлаб чиқарувчилар қимматбаҳо металларнинг харидорлари ҳисобланади.