Энергетика вазирлигига ҳукумат билан келишган ҳолда, ҳаво ҳароратидан келиб чиқиб, базавий меъёрларнинг иситиш ва бошқа мавсумлардаги амал қилиш муддатларига ўзгартириш киритиш ваколати берилди.

Қайд этилишча, Энергетика вазирлиги, “Ҳудудий электр тармоқлари” АЖ ва “Ҳудудгазтаъминот” АЖ базавий меъёрларнинг амал қилиш муддатларига киритилган ўзгартиришлар тўғрисида ўзининг расмий веб-сайти ҳамда оммавий ахборот воситалари орқали эълон қилиб боради.

2024 йил 1 майдан бошлаб маиший истеъмолчилар (аҳоли хонадонлари) учун электр энергияси ва табиий газдан фойдаланишда ижтимоий (базавий) меъёрлар киритилган эди.

Жумладан,

• электр энергияси – ойига 200 kWh’гача;
• табиий газ (март–октябр ойларида) – ойига 100 кубометргача;
• табиий газ (ноябр–феврал ойларида) – ойига 500 кубометргача.

Географик ва иқлим шароитларини инобатга олган ҳолда, Қорақалпоғистон Республикаси ва Хоразм вилоятида иситиш мавсуми республиканинг бошқа ҳудудларидан фарқли равишда октябрь–февраль ойлари деб белгиланган. Ижтимоий меъёр доирасида аҳолига электр энергияси ва табиий газ имтиёзли нархларда етказиб берилади.

2025 йил 1 март куни табиий газ учун иситиш мавсумида белгиланган 500 кубометрлик базавий меъёр Энергетика вазирлиги томонидан 1 апрелга қадар узайтирилди. Бунга ҳаво ҳароратининг меъёрдан паст бўлиши билан изоҳ берилди. Олдин бундай ваколат фақат Вазирлар Маҳкамасида бор эди.