Март ойида Ўзбекистонда истеъмол нархлари индекси 0,9 фоизга ўсди. Бу ҳақда Статистика агентлиги хабар берди.

Республика бўйича ўртача кўрсаткичдан юқори қисқа муддатли Истеъмол нархлари индекси (ИНИ) Жиззах, Навоий ва Сурхондарё вилоятларида кузатилди. 2025 йил I чорагида нархларнинг республика бўйича ўртача кўрсаткичдан юқори ўсиш суръати Қорақалпоғистон Республикаси, Қашқадарё, Навоий, Самарқанд, Сурхондарё, Тошкент вилоятлари ва Тошкент шаҳрида қайд этилди.

Март ойида озиқ-овқат инфляцияси бошқа гуруҳларга нисбатан юқорироқ бўлди. Озиқ-овқат маҳсулотлари ИНИ ой давомида 101,5 фоизни, ноозиқ-овқат маҳсулотларда 100,2 фоизни, хизматларда 100,7 фоизни ташкил этди.

2024 йилнинг мартидаги кўрсаткич билан таққослаганда озиқ-овқат маҳсулотларининг 2025 йил март ойидаги қисқа муддатли ИНИ 0,7 фоиз бандга баланд бўлди. Бу ҳолат асосан гўшт ва ёғ-моҳ маҳсулотлари нархлари ўсиш суръатининг тезлашгани билан боғлиқ бўлса, 2024 йилнинг I чорагида мазкур гуруҳларда нархларнинг пасайганлиги қайд этилган.

Ўтган ой давомида қўй гўшти 9 фоизга, мол гўшти эса 8,3—8,8 фоизга қимматлашди. Парранда гўшти эса 0,6 фоизга, тирик балиқ — 1,7 фоизга қимматлашган. Гуруч ва буғдой уни нархлари эса мос равишда 2,3 ва 1,4 фоизга арзонлашган.

Шунингдек, сабзи нархи 15 фоизга, помидор — 4,3 фоизга, булғор қалампири — 3,8 фоиз, карам — 2,6 фоиз, пиёз эса қарийб 2 фоизга қимматлашган. Бодринг (-14,7 фоиз) ва картошка (-3,7 фоиз) арзонлашган.

Пуллик хизматлар нархлари 0,7 фоизга қимматлашган — бу йил бошидаги кўрсаткичдан камроқ. Шу билан бирга, ўтган йилнинг март ойи билан таққослаганда сервис инфляцияси 27 фоизни ташкил этган.