Автомобиль транспортида йўловчи ташиш фаолиятини тартибга солишга қаратилган ҳукумат қарори қабул қилингани ҳақида хабар берилганди. Тошкентда ўзини ўзи банд қилган шахсларга минивенларда таксичилик қилишга рухсат берилади.

Ҳужжат билан енгил автомобилларда йўналишсиз такси фаолиятини амалга ошириш тўғрида низом тасдиқланди. Низом юридик (агрегатор) ва жисмоний шахсларга (ўзини ўзи банд қилганлар) ушбу фаолият билан шуғулланиш тартибини белгилаб беради.

Йўналишсиз таксиларни ташқи ва ички маълумотларнинг мавжудлиги ажратиб туради ва бу барча ташувчилар учун мажбурийдир. Бундан буюртма билан йўловчи ташувчи ҳамда лицензияга эга бўлмаган ҳайдовчилар мустасно.

Уларни ташқи маълумотлар билан жиҳозлашга автомобиль тепасига «ТАХІ» таниш белгисини ўрнатиш, агрегаторларга тегишли мошиналарнинг олд ва орқа эшикларига қора квадратлар ҳамда композицияларни ёпиштириш киради.

Ички маълумотлар учун эса такси паспорти жорий этилиб, у ташувчиларга лицензия варақаси билан бирга бепул берилади. Ушбу паспорт йўловчилар бемалол ўқий оладиган жойга ўрнатилиши керак.

Такси паспортида қуйидаги маълумотлар бўлади:

• юридик шахс номи ва манзили;
• ўзини ўзи банд қилган ташувчи ёки ҳайдовчининг исм-фамилияси, отасининг исми;
• ҳайдовчининг фотосурати;
• фаолият ҳудуди;
• ҳайдовчининг телефон рақами;
• автомобилнинг давлат рақами белгиси, ишлаб чиқарилган йили ҳамда лицензия варақаси (рақами ва амал қилиш муддати).

Ҳар бир автомобиль техник ва бошқа талабларга жавоб бериши керак. Тўловларни агрегатор ёки бошқа электрон тўлов тизимлари орқали қабул қилиш, таксометр функцияларини таъминлайдиган махсус иловага эга мосламалар (телефонлар, планшетлар) бўлиши талаб этилади.

Шу билан бирга, ташувчининг мажбурий суғуртаси мавжуд бўлиши, шаҳар йўналишларидаги автомобиллар 15 йилдан ортиқ фойдаланилган бўлмаслиги зарур. Дамас ва шу каби автомобилларда таксичилик қилиш тақиқланади.

Йўналишсиз такси фаолияти билан Б тоифасидаги ҳайдовчилик гувоҳномаси эга, 21 ёшга тўлган, тиббий кўрикдан ўтган ва камида уч йиллик ҳайдовчилик стажига эга Ўзбекистон фуқаролари шуғулланишлари мумкин. Бу ИИВ томонидан назорат қилинади.

Лицензия берилган фаолият тури билан фақат унга эга жисмоний ёки юридик шахс шуғулланиши мумкин. Лицензияларни ёки уларга доир ҳуқуқларни бошқа шахсларга бериш тақиқланади.

Юридик шахсларга тегишли йўналишсиз таксиларнинг ҳайдовчилари тегишли лицензия варақасига, автомобиль техник кўрикдан ва ҳайдовчилар эса тиббий кўрикдан ўтказилганлиги тўғрисида йўл варақасига эга бўлиши шарт.

Ўзини ўзи банд қилган шахслар ўз автомобилини бир йилда бир маротаба техник кўрикдан ўтказиши керак. Лицензия варақасида кўрсатилган ва унга туташ ҳудудларда ташувларни амалга ошириш мумкин.

Жамоат транспорти йўналишида ёки трафарет билан йўловчи ташиш тақиқланади. Белгиланган талабларга амал қилмаслик ҳайдовчига нисбатан чора қўллашга сабаб бўлади.

Йўналишсиз таксиларнинг йўловчилар ҳамда багажни ташиш тарифлари миқдори автомобиль турлари ва хизматларига қараб белгиланади. Ҳисоб-китоблар нақд пул, банк пластик карталари ҳамда электрон тўлов воситаси орқали амалга оширилади.

Йўл ҳақи йўловчилар ҳамда ташилган багажлар сонидан қатъи назар йўловчи томонидан сафар тугаб, багаж туширилгандан (мавжуд бўлса) кейин тўланади. Бунда йўл ҳақи ташувчи ёки агрегатор томонидан белгиланган қоидалар асосида хизмат кўрсатиш тугагунгача қисмларга бўлиб тўланиши мумкин.