Эксклюзив ҳуқуқлар берилган корхоналар реестри эълон қилинди
Рақобат қўмитасига кўра, 67 та тадбиркорлик субъектлари ва давлат ташкилотларига жами 81 та фаолият турлари бўйича эксклюзив ҳуқуқ бириктирилган.
Эксклюзив ҳуқуқлар берилган хўжалик юритувчи субъектлар реестри эълон қилинди. Бу ҳақда Рақобат қўмитаси матбуот хизмати хабар берди.
Рўйхат жорий йилнинг 28 февралида қабул қилинган президентнинг иқтисодиётда рақобатни ривожлантириш ва хусусий секторнинг ролини ошириш тўғрисидаги фармонига мувофиқ шакллантирилди.
Хусусан, 67 та тадбиркорлик субъектлари ва давлат ташкилотларига жами 81 та фаолият турлари бўйича эксклюзив ҳуқуқ бириктирилган. Улар биринчи навбатда энергетика соҳасига, фойдали қазилмаларни қазиб олишга ҳамда давлат билан боғлиқ функцияларга тааллуқлидир.
Масалан, 26 та компания аҳоли сони 20 минг кишидан кам бўлган шаҳар посёлкаларининг бош режаларини ишлаб чиқиш бўйича мутлақ ҳуқуққа эга. Электрон онлайн-аукционларни ташкил этиш марказига (E-auksion) эса 16 та эксклюзив ҳуқуқ берилган.
Рўйхатдаги кам сонли хусусий компаниялардан бири CRPT Turon ҳисобланади. Корхона Asl Belgisi маҳсулотларни маркировкалаш тизимининг эксклюзив оператори бўлиб, мажбурий маркировкаланадиган маҳсулотларни ишлаб чиқарувчилар ва импорт қилувчиларга кодларни тақдим этади.
Рақобат қўмитаси ўтган давр мобайнида, давлат раҳбарининг тегишли қарорлари билан 24 та тадбиркорлик субъектлари ва давлат ташкилотларига берилган эксклюзив ҳуқуқлар бекор қилинганини қўшимча қилди.
Эксклузив ҳуқуқ берилган хўжалик юритувчилар рўйхати ва уларнинг фаолият турлари билан батафсил ҳавола орқали танишиш мумкин.
