Хизматдан Ягона портал орқали фойдаланиш мумкин ҳамда бунинг учун ҳеч қандай тўлов мавжуд эмас. Бунинг учун «Қишлоқ ҳудудларида хорижий тилларни ўқитиш фаолиятини ташкил этиш учун нодавлат таълим ташкилотларига субсидия ажратиш» хизмати танланади.

Ундан фақат юридик шахслар фойдаланишлари мумкин. Бу турдаги субсидиялар қуйидаги мақсадларда ажратилади:

• бино ва ўқув хоналарини АКТ, мебель, асбоб-ускуналар, техник восита ва бошқа анжомлар билан жиҳозлаш;
• зарур дарсликлар, ўқув-методик адабиётлар ва кутубхона-ахборот ресурслари ҳамда воситалари билан таъминлаш;
• педагогларга ҳақ тўлаш.

Бунинг учун қуйидаги ҳужжатлар талаб этилади:

• 2 йилга мўлжалланган бизнес режа;
• маҳсулот етказиб бериш ёки ишларни, хизматларни бажариш тўғрисида тузилган хўжалик шартномалари;
• педагог кадрлар билан тузилган меҳнат шартномалари;
• педагог кадрларнинг хорижий тилни билиш даражасини тасдиқловчи сертификатлари (мавжуд бўлса);
• таълим жараёнида фойдаланилаётган бино ёки ўқув хоналарининг ижара шартномаси (кўчмас мулк ижараси асосида фаолият юритаётган нодавлат таълим ташкилотлари учун).

Талабгорлар барча ҳужжатларни платформага Pdf шаклида юклашлари керак бўлади.

Аризаларни жорий йилнинг 10 апрелигача ҳавола орқали жўнатиш мумкин. Аризалар бир ой ичида кўриб чиқилади.

Белгиланган муддат тугагач, бу турдаги субсидиялар учун аризалар қабулининг кейинги тўлқини жорий йилнинг июль ойида бошида очилади.