Жорий йилнинг биринчи чорагида Ўзбекистонда ўртача ойлик номинал ҳисобланган иш ҳақи 5 млн 796,1 минг сўмни ташкил этди. Бу ҳақда Миллий статистика қўмитаси маълум қилди.

Кўрсаткич 2024 йилнинг мос даврига нисбатан 18 фоизга ўсган. 2021 йил билан таққослаганда эса, икки баравар ошган.

Январь—март ойларида ҳудудлар кесимида энг юқори иш ҳақи Тошкент шаҳрига тўғри келди — 9,88 млн сўм (22,7 фоиз). Кейинги ўринларда 7,33 млн сўм билан Навоий ҳамда 5,43 млн сўм билан Тошкент вилоятлари турибди. Иш ҳақининг энг кам миқдори эса 4,08 млн сўм билан Қашқадарё вилоятида қайд этилди.

Январь—март ойларида соҳалар кесимида энг юқори ўсиш (26,8%) ахборот ва алоқа соҳасида кузатилиб, ўртача ойлик иш ҳақи 14,81 млн сўмга етди. Санъат, кўнгил очиш ва дам олиш йўналишларида ўсиш 20,2% ни, иш ҳақи эса 4,83 млн сўмни ташкил этди.

Банк ва суғурта соҳасида ўртача иш ҳақи энг юқори — 15,84 млн сўмни қайд этганига қарамай, ўсиш 19,8% бўлди. Таълим соҳасида ўртача иш ҳақи 4,04 млн сўм билан 17,7% га, ташиш ва сақлаш соҳаларида эса 8,71 млн сўм билан 16% га ошган.

Бу даврда энг паст иш ҳақи (3,62 млн сўм) соғлиқни сақлаш ва ижтимоий хизматлар соҳасида қайд этилиб, ўсиш ўтган йилнинг мос даврига нисбатан 11,1% ни ташкил этди.

Ахборот ва алоқа соҳаси

Мазкур соҳанинг асосий тармоқлари бўйича ўртача маошнинг энг юқори кўрсаткичи қуйидагича:

• дастурлаштириш, маслаҳат бериш ва бошқа ёрдамчи хизматлар — 20,78 млн сўм;
• ахборот хизматини кўрсатиш — 19,51 млн сўм;
• алоқа соҳаси — 11,14 млн сўм;

Молия ва суғурта соҳаси

Бунда энг юқори ўртача ойлик иш ҳақи мажбурий ижтимоий суғурталашдан ташқари, қайта суғурталаш ва нафақа жамғармалари ҳамда молиявий хизматлар ва суғурталаш фаолиятида қайд этилган — мос равишда 17,74 млн ва 17,53 млн сўм.

Энг паст кўрсаткич эса суғурталаш ва нафақа таъминоти хизматларида (15 млн сўм) кузатилган.

Таълим соҳаси

Бу соҳада ўртача ойлик иш ҳақининг энг юқори кўрсаткичи олий таълимда қайд этилди — 9,59 млн сўм. Энг паст кўрсаткич эса мактабгача таълимга тўғри келади — 2,16 млн сўм.

Техник ва профессионал таълимда ўртача маош 4,15 млн сўмни ҳамда умумий ўрта таълимда 3,97 млн сўмни ташкил этган.