Бир қатор давлат банкларини сотиш яна кечиктирилди
«Ўзсаноатқурилишбанк»ни хусусийлаштиришнинг якуний босқичи 2025−2026 йилларга, «Асакабанк», «Алоқабанк» ва «Туронбанк»ники эса 2026−2027 йилларга мўлжалланяпти.
Иқтисодиёт ва молия вазирлиги Ўзбекистоннинг 2026–2028 йилларга мўлжалланган Фискал стратегиясини тақдим қилди.
Унда Ўзбекистон тўртта йирик давлат банки — «Ўзсаноатқурилишбанк», «Асакабанк», «Алоқабанк» ва «Туронбанк»ни хусусийлаштириш муддати янгиланган.
«Ўзсаноатқурилишбанк»ни хусусийлаштириш 2025–2026 йилларга, қолган уч банкники эса 2026–2027 йилларга мўлжалланган.
Хусусийлаштириш икки босқичда амалга оширилади. Биринчи босқичда банкларни институционал ўзгартириш (фаолиятини трансформация қилиш), иккинчи босқичда эса давлат акциялари пакетини сотиш назарда тутилган.
«Банк тизимини ислоҳ қилиш даврида аҳолининг молиявий хизматларга бўлган талабини қондириш, инвестиция лойиҳаларини қўллаб-қувватлаш механизмини кенг жорий қилиш, банк хизматларининг ҳудудий қамровини таъминлаш мақсадида «Ташқи иқтисодий фаолият Миллий банк» АЖ, «Агробанк» АТБ, «Халқ банки» АТ, «Микрокредитбанк» ва «Бизнесни ривожлантириш банки» АТБ устав капиталларидаги давлат улушини сақлаб қолиш мақсад қилинган», дейилади ҳужжатда.
Маълумот учун, мамлакатдаги иккинчи йирик банк ҳисобланган «Ўзсаноатқурилишбанк»даги барча давлат улушини 2022 йил охиригача, кейинчалик эса 2023 йил охиригача савдога чиқариш режалаштирилганди. Шундан сўнг 2024 йил охиригача хусусийлаштириш орқали банкдаги давлат улушини 50 фоиздан камайтиришга қарор қилинди, аммо бу амалга ошмади.
Аввалроқ «Асакабанк» хусусийлаштириш муддати 2023 йил охиридан 2025 йил охиригача сурилгани хабар қилинганди. «Асакабанк» бугунги кунда Тикланиш ва тараққиёт жамғармаси (88,22 фоиз), Иқтисодиёт ва молия вазирлиги (10,85 фоиз), Бухоро нефтни қайта ишлаш заводи (0,73 фоиз), «Ўзавтосаноат» (0,1 фоиз), «Ўзагросуғурта» (0,08 фоиз) ва «Ўзбекинвест»га (0,02 фоиз) тегишли.
2025 йил 1 январгача (аввал 2023 йил 1 июлгача эди) фонд биржасида «Алоқабанк» учун IPO ўтказиш режалаштирилганди. Бу банкдаги улушлар қуйидагича тақсимланган: Тикланиш ва тараққиёт жамғармаси — 61,8 фоиз, «Ўзбектелеком» — 22,03 фоиз, Ахборот-коммуникация технологияларини ривожлантириш жамғармаси — 6,3 фоиз, Иқтисодиёт ва молия вазирлиги — 4,32 фоиз, «Электромагнит мослашув маркази» ДУК — 2,11 фоиз, бошқалар — 3,44 фоиз.
Жорий йилнинг январ ойида қабул қилинган президент фармонида 2025 йилнинг якунигача юқоридаги 3 та банкни сотишни амалга ошириш кўзда тутилганди.
