Тошкент бозорларида арзонлаштирилган нархларда гўшт сотилиши бошланди. Бу ҳақда пойтахт матбуот хизмати хабар берди.

Ҳокимлик пойтахтда аҳолини сифатли ва ҳамёнбоп озиқ-овқат маҳсулотлари билан таъминлаш бўйича «тизимли ишлар олиб борилаётгани»ни қайд этди. Натижада нархларнинг фуқаролар учун «сезиларли даражада ўзгаришига эришилган».

Хусусан, Тошкентдаги Авиасозлар, Фарҳод, Эски жува (Чорсу), Юнусобод ҳамда Қўйлиқ деҳқон бозорларидаги қўшимча равишда 84 та раста ташкил этилиб, савдо нуқталарининг умумий сони 708 тага етказилди.

3 август ҳолатига кўра, пойтахт бозорларига 87,9 тонна гўшт етказиб берилган. Шундан 21,8 тоннаси ёки жами ҳажмнинг 27,6%и қўшимча ҳажмни ташкил этди. Унинг тақсимоти қуйидагича:

• Авиасозлар — 3,1 тонна;
• Фарҳод — 5,6 тонна;
• Эски Жува — 6 тонна;
• Юнусобод — 3,2 тонна;
• Қўйлиқ — 4 тонна.

Ҳокимликнинг қайд этишича, мазкур расталарда гўшт арзонлаштирилган нархларда сотилмоқда. Унга кўра, маҳаллий мол гўшти 85 минг сўмни, қўй гўшти эса 90 минг сўмни ташкил этади. Шу билан бирга, Беларусь мол гўшти 70 минг сўмдан сотилмоқда. Музлатилган гўшт — 65 минг сўм.

Шу билан бирга, Мирзо Улуғбек туманидаги Наврўз бозорида ҳам яна бир арзонлаштирилган савдо нуқтаси иш бошлади. У орқали маҳаллий ишлаб чиқарилган гўшт, шунингдек, Беларусь, Мўғулистон ва Ҳиндистондан импорт қилинган маҳсулотлар сотилади. Жумладан, Мўғулистондан келтирилган қўй гўшти 75 минг сўмдан таклиф этилмоқда.

Марказий банк маълумотларига кўра, гўшт сўнгги бир йил ичида нархлари энг кўп ошган маҳсулотлар қаторига кирди. Қўй гўшти 32% га, мол гўшти 30,5% га қимматлашган. Шу билан бирга, озиқ-овқат саватидаги маҳсулотларнинг 80%и 10% дан камроққа қимматлашди.

Қишлоқ хўжалиги вазирлиги май ойида гўшт нархининг ошишини бир неча омиллар, жумладан, импорт қилувчилар томонидан талабнинг юқорилиги, озуқа ва транспорт нархининг ошиши билан изоҳлаганди. Шу билан бирга, вазирлик Ўзбекистон «гўшт нархи энг арзон бўлган давлатлар қаторига киришини» таъкидлади.