Экспортчилар ўзбек сўмининг мустаҳкамлигидан шикоят қилиб, миллий валютани заифлаштиришга чақирди. Бу ҳақда 4 август куни Савдо-саноат палатаси томонидан экспортчи корхоналар вакиллари билан ташкил этилган очиқ мулоқотда сўз борди.

«Экспортни ривожлантириш учун фақат солиқ ва бошқа имтиёзлар билан чекланиб қолмаслик керак. Марказий банк ушлаб турилган доллар курсини қўйиб юбориши керак, деб ўйлайман», — деди тўқимачилик компанияси вакили.

Унинг сўзларига кўра, миллий валютада ифодаланган харажатлар ўсиб бормоқда, доллар курси эса пасаймоқда. Тадбиркор сўмдаги харажатларнинг ошиши экспортчилар учун катта муаммоларни келтириб чиқариши ҳақида огоҳлантирди. Тўқимачилик маҳсулотларини етказиб беришда маҳаллий бизнес Хитой, Бангладеш ва Миср билан таннарх бўйича рақобатлашади.

«Агар доллар курси қўйиб юборилса, бу экспортчилар муаммоларининг 70−80%ини ҳал қилади,» — дея қўшимча қилди у.

Марказий банк раиси ўринбосари Аюбхон Камалов регулятор валюта курсининг шаклланишига аралашмаслигини айтиб, биржада (ЎзРВБ) хорижий валютани исталган ҳажмда сотиб олиш ва сотишни таклиф қилди.

«Сўнгги 2−3 ой ичида доллар курси кескин тебранмоқда: гоҳ кўтарилиб, гоҳ пасайиб кетмоқда. У пасайганда ҳамма ваҳимага тушади: нега пасаяпти, деб. Кўтарилганда эса нега кўтариляпти, деб сўрашади. Марҳамат, биржа мавжуд — хоҳлаганингизча сотинг ва сотиб олинг», дея таъкидлади у.

Марказий банк раис ўринбосари экспортчиларга ўзлари учун мақбул бўлган доллар курсини айтишни, сўнгра бу таклифни муҳокамага қўйишни тавсия этди. Савдо-саноат палатаси раиси Даврон Ваҳобов долларнинг исталган курси 16−17 минг сўм атрофида эканлигини маълум қилди.