Жорий йил I ярмида мамлакатда харажатлари даромадларидан энг кўп ҳудуд Фарғона вилояти бўлди. Бу ҳақда Иқтисодиёт ва молия вазирлиги тақдим этган маҳаллий бюджетлар таҳлилида келтирилган.

2025 йил январь—июнь ойларида Ўзбекистон маҳаллий бюджетлари даромадлари 33,7 трлн сўмни, харажатлари 48,5 трлн сўмни ташкил этди. Мазкур даврда республиканинг барча ҳудудлари бюджетларида камомад кузатилган.

Тошкент шаҳрининг даромад ва харажатлари республика бўйича энг юқори даражада қайд этилди. Жумладан, пойтахтнинг ярим йиллик тушумлари 6,8 трлн сўм, чиқимлари 7,3 трлн сўм бўлди.

Кейинги ўринни Тошкент вилояти банд қилди. Ҳудуд бюджетига олти ойда 3,56 трлн сўм даромад, 3,9 трлн сўм харажатлар қилинди.

Самарқанд ва Фарғона вилоятларининг ярим йиллик тушумлари 2,9 трлн сўмдан (ҳар бириники) ортди. Чиқимларга келганда Фарғона кўпроқ—4,7 трлн сўмдан ортиқ, Самарқанд эса 4,1 трлн сўм сарфлаган.

Ҳудудлар кесимида энг кам даромадни Сирдарё вилояти топган—885 млрд сўм. Унинг харажатлари эса 1,96 трлн сўмдан ортиқни ташкил қилган.

Ўз навбатида даромадлари сезиларли кам ҳудудлар — Жиззах (1,1 трлн сўм) Хоразм (1,6 трлн сўм), Сурхондарё (1,7 трлн сўм), Навоий (1,7 трлн сўм) вилоятлари бўлган.

Олти ойлик рақамларга кўра, бюджети тақчиллиги энг йирик ҳудуд Фарғона вилояти бўлди — 1,8 трлн сўм. Вилоят бюджетига камомадни ёпиш учун республика бюджетидан 1,1 трлн сўм трансферт маблағлари ўтказилган. Бу бошқа ҳудудларга қараганда энг кўп ўтказма ҳисобланади.

Бюджети тақчиллиги нисбатан юқори ҳудудлар Самарқанд (1,6 трлн сўм), Андижон (1,5 трлн сўм), Наманган (1,36 трлн сўм) вилоятлари ҳамда Қорақалпоғистон Республикаси (1,4 трлн сўм) бўлган.

Даромад ва харажатлар ўртасидаги энг кам тафовут Навоий вилояти бюджетида қайд этилган — 279 млрд сўм.

Шунингдек, Тошкент вилояти (365 млрд сўм) ва Тошкент шаҳри (527 млрд сўм) бюджет камомадлари қолган ҳудудлардагига нисбатан камроқ бўлган.

Маълумот учун, 2024 йил I ярмида ҳудудлар бюджети даромадлари 24,7 трлн сўм, харажатлари 39,7 трлн сўмни ташкил этган. Олти ойда республика бюджетидан энг кўп трансфертлар Андижон вилоятига (1,1 трлн сўм) ўтказилган. Ўз навбатида Фарғона вилояти (1 трлн сўм) ва Қорақалпоғистонга (1 тлн сўм) ҳам бошқа ҳудудларга қараганда кўпроқ ёрдам маблағлари ажратилган.