Ўзбекистонда июль ойида ҳам 0,2 фоизлик дефляция қайд этилди. Бу Миллий статистика қўмитаси хабар берди.

Ой якунига кўра йиллик инфляция 8,9 фоизни ташкил этиб, 2024 йилнинг июль ойига (110,5 фоиз) нисбатан 1,6 фоиз бандга пасайди. Йил бошидан буён йиғма инфляция 4 фоизга етди (2024 йил январь июлида 4,9 фоиз).

Мева ва сабзавот маҳсулотлари нархларининг ўзгаришини ҳисобга олмаганда, ойлик инфляция кўрсаткичи 0,5 фоизга йил бошидан бери 5,7 фоизга, йиллик ҳисобда эса 10,2 фоизга етган.

Ойлик ҳисобда ҳудудлар кесимида нархлар энг кўп Сирдарёда ошган (+0,7 фоиз). Андижон, Хоразм ва Қорақалпоғистон Республикасида нархлар энг кўп (-0,4 фоиз) пасайган. Йиллик ҳисобда эса нархлар Фарғонада (+9,9 фоиз) энг кўп, Жиззахда энг кам (8,2 фоиз) ошган.

Июль ойида озиқ-овқат маҳсулотлари бўйича 1 фоизлик дефляция қайд этилди. Ноозиқ-овқат маҳсулотлари нархлари 0,2 фоизга, хизматлар нархлари эса 0,9 фоизга ошди.

Йил бошидан бери товарлар бўйича 1,8 фоизга, шу жумладан, озиқ-овқат маҳсулотлари 0,6 фоизга, ноозиқ-овқат маҳсулотлар 3,3 фоизга, хизматлар 11,7 фоизга қимматлади.

Йиллик ҳисобда эса озиқ-овқат маҳсулотлари нархи 6,5 фоизга, ноозиқ-овқат маҳсулотлариники 7,1 фоизга, хизматлар нархи эса 16,3 фоизга ошди. Йиллик инфляция учун бу гуруҳдаги асосий инфляция омили коммунал хизматлар соҳасида тарифларни ошишининг юқори таъсири бўлиб қолмоқда.

Июнь ойи билан солиштирганда энг кўп турар жой хизматлари, сув, электр, газ ва бошқа ёнилғилар нархи қимматлаган (1,4 фоиз). Озиқ-овқат маҳсулотлари ва спиртсиз ичимликлар гуруҳида эса нархлар ўртача 1,1 фоизга пасайган.

Йил бошидан ҳисоблаганда энг кўп транспорт хизматларида нархлар ошган (9,5 фоиз). Суғурталаш ва молиявий хизматлар нархларида эса кичик пасайиш кузатилган (-0,1 фоиз).

Йиллик ҳисобда эса турар жой хизматлари, сув, электр, газ ва бошқа ёнилғилар (16,7 фоиз), транспорт хизматлари (15,5 фоиз), таълим соҳасидаги хизматлар (13,9 фоиз), ресторан ва меҳмонхона хизматлари (12,9 фоиз) энг кўп қимматлади. Суғурталаш ва молиявий хизматлар нархида эса энг паст ўсиш қайд этилди (0,4 фоиз).

Озиқ-овқат маҳсулотлари ва спиртсиз ичимликлар гуруҳида ўртача нархлар даражаси июль ойи давомида 1,1 фоизга камайди, бу асосан мавсумийлик омили бўлиб, йиғма инфляцияга пасайтирувчи таъсир кўрсатди.

Ой давомида нархларнинг тушиши асосан мева ва сабзавот маҳсулотларида, шу жумладан «мева ва ёнғоқлар» (-9,1 фоиз) ҳамда «сабзавотлар, илдизмевалилар ва дуккакли маҳсулотлар» гуруҳларида (-4,8 фоиз) кузатилди.

Бошқа гуруҳлардан ўртача нарх даражасининг пасайиши «сут, бошқа сут маҳсулотлари ва тухум» (-0,8 фоиз) ва «дон ва дон маҳсулотлари» (-0,1 фоиз) гуруҳларида ҳам қайд этилди. Энг муҳим ўсиш эса «янги сўйилган, совитилган ёки музлатилган гўшт» гуруҳида (+1,9 фоиз) кузатилди.

2025 йил июль ойидан бошлаб, Бухоро, Наманган, Сирдарё ва Тошкент вилоятларида совуқ сув ва канализация учун янги тарифлар жорий қилинди, Навоий ва Самарқанд вилоятида эса маиший чиқиндиларни олиб кетиш, Жиззах, Қашқадарё ва Фарғона вилоятларида кўп қаватлик уйларга хизмат кўрсатиш хизмати тарифлари ошди.

Умуман ҳисобда совуқ сув ва турар жойлар билан боғлиқ бошқа хизматлар бўйича инфляция ой давомида республика бўйича 7,5 фоизни ташкил этди.

2025 йилнинг январь—июль ойлари учун инфляция ўсишига энг катта таъсирни «турар жой хизматлари, сув, электр, газ ва бошқа ёнилғи турлари», «транспорт», «маиший товарлар ва хизматлар, турли товарлар ва хизматлар» бўлимларидаги нархлар ва тарифларнинг ўзгариши ўтказган. Нархлардаги умумий ўсишнинг 78,3 фоизи шу бўлимлардаги товар ва хизматлар қимматлашуви ҳиссасига тўғри келган.