Uzum Хитой компаниясидан 70 млн доллар жалб қилиб, 1,5 млрд долларлик компанияга айланди
Бу Хитой холдингининг Ўзбекистондаги компанияга киритган биринчи технологик сармояси бўлди.
Uzum рақамли экотизими Хитойнинг Tencent Holdings Ltd. компанияси ва VR Capital халқаро инвестиция фондидан қарийб 70 млн доллар жалб қилди.
Натижада, экотизим Tencent’нинг Ўзбекистондаги компанияга киритган биринчи технологик сармояси бўлди. Uzum маблағларни жалб қилгандан сўнг, якуний баҳоси тахминан 1,5 млрд долларни ташкил этди.
Жалб этилган маблағлар экотизимнинг ўз финтех инфратузилмасини, шунингдек, рақамли e-commerce ечимларини ривожлантириш, маҳсулот линиясини кенгайтириш, мамлакатнинг онлайн савдо ва финтеч бозорида Uzum етакчилигини мустаҳкамлашга йўналтирилади.
«Биринчи ярим йилликда Uzum электрон тижоратининг бутун сегменти айланмаси 1,5 баравар ошди», — деди Uzum асосчиси ва бош директори Жасур Жумаев. Унинг қайд этишича, Uzum Bank карталари фойдаланувчилари 2 млндан ортиқни ташкил этади. Uzum Tezkor етказиб бериш сервиси 25 та шаҳарда тақдим этилган.
2024 йилнинг мартида Uzum рақамли экотизимига 100 млн долларлик хорижий сармоя жалб этилганди. Бу орқали Uzum 1 млрд доллардан ортиқ қийматга эга бўлган биринчи маҳаллий технологик яккашох компания бўлган эди.
