Вазирлар Маҳкамаси томонидан замонавий архитектура ва техник ечимлардан фойдаланган ҳолда ички туризмни ривожлантириш бўйича комплекс чора-тадбирларни назарда тутувчи қарор тайёрланди.

Ушбу ҳужжат минтақа ва унинг аҳолисининг узоқ муддатли манфаатларига, ҳудуднинг инвестициявий жозибадорлигини оширишга йўналтирилган барқарор ва мувозанатли ривожланиш моделини шакллантириш учун асос бўлади.

Қарорга кўра, лойиҳани экологик талабларга риоя қилган ҳолда амалга ошириш, шу жумладан, лойиҳани амалга ошириш даврида ва лойиҳа ишга тушгандан кейин чиқинди ҳамда оқова сувларнинг Чорвоқ сув омбори ва Чирчиқ дарёсига ташланишига йўл қўймаслик, оқова сувларни Чирчиқ шаҳри оқова сувларни тозалаш иншоотига йўналтириш чораларини кўриш «Sea Breeze Uzbekistan» МЧЖнинг асосий мажбуриятларидан бири этиб белгиланади. Бунда ушбу талабга риоя этмаслик лойиҳани тўхтатишга ва ерга бўлган ижрага ҳуқуқининг бекор қилинишига асос бўлади.

Sea Breeze Uzbekistan тасдиқланган лойиҳани амалга ошириш доирасида бир қатор мажбуриятларни
ўз зиммасига олади. Хусусан:

• Лойиҳа қурилишида Чорвоқ сув омборига бир томчи ҳам оқава сув туширилмаслиги шарт этиб белгиланди;
• Курорт ҳудудида атроф-муҳит ҳолати, жумладан, сув сифати устидан давлат органлари томонидан доимий назорат ўрнатилади;
• Лойиҳани амалга оширишда бузиладиган ҳар қандай хусусий мулк объектлари, шу жумладан, дала ҳовлилар ва мулкчиликнинг бошқа шакллари компенсацияланади;
• Яшил майдонлар экологик ва эстетик қиймати даражасига кўра таснифланади ва энг муҳим намуналарга нисбатан кесиш эмас, балки кўчириб ўтказиш чоралари кўрилади;
• Бош прокуратура курорт ҳудудида барча шаҳарсозлик ва экологик меъёрларга риоя этилишини алоҳида назоратга олади. Экология вазирлиги ва Бош прокуратура дастлабки лойиҳа ечимларидан тортиб, объектларни фойдаланишга топширишгача бўлган барча жараёнларнинг шаффофлиги ва қонунийлигини таъминлашга масъул ҳисобланади.