Ўзбекистонда 2 октябрдан ипотека кредитлари бўйича субсидияга аризалар қабул қилиш бошланмоқда. Бу ҳақда Иқтисодиёт ва молия вазирлиги хабар берди.

Президентнинг 21 февралдаги фармонига мувофиқ, 2025 йил учун ипотека кредитлари бўйича субсидиялар сони 2024 йилга нисбатан 1,5 баравар оширилди — 30 мингтагача ариза берувчи ипотека ёрдамини олади. Бунинг учун давлат буджетидан 2,5 триллион сўм, ипотека кредитларининг ўзига эса 20,9 триллион сўм ажратилиши кўзда тутилган.

2025 йил учун белгиланган мақсадли кўрсаткичлар доирасида ипотека кредитлари бўйича субсидия хабарномаларининг фойдаланилмаган қисми ҳисобидан аризалар 2025 йил 2 октябрь куни соат 09:00 дан бошлаб қабул қилинади, дейилади хабарда.

Субсидия олишга ариза қолдириш учун қуйидаги манзилларга мурожаат қилиш лозим:

• давлат хизматлари марказларига.
• my.gov.uz портали орқали онлайн.

Субсидия олиш учун ариза берувчининг ижтимоий мезонлар асосида камида 30 балл тўплаган бўлиши лозим.

Ариза берувчи ва унинг яқин қариндошларининг (бунда яқин қариндошлар аризада кўрсатилган ҳолларда) ўртача даромад миқдори қуйидаги чегараларда бўлиши зарур:

• Қорақалпоғистон Республикаси ва вилоятларда: МҲТEКМнинг 2,7 баравардан (3 118 500 сўм) — 8 бараваргача (9 240 000 сўм);
• Тошкент шаҳрида: МҲТEКМнинг 2,7 баравардан (3 118 500 сўм) — 9,2 бараваргача (10 626 000 сўм).

Ариза берувчи, шу жумладан, унинг турмуш ўртоғи номида бутун республика бўйлаб мулк ҳуқуқи асосида турар жой мавжуд бўлмаслиги лозим. Шунингдек, ижтимоий ҳимояга муҳтож шахслар алоҳида мезонлар асосида баҳоланади.

Эслатиб ўтамиз, олдинги босқич июль ойида бўлиб ўтганди. Аввалроқ Ипотекани қайта молиялаштириш компанияси норасмий даромадга эга бўлган мижозларга берилган ипотека кредитларини қайта молиялаштириши маълум қилинган эди. Бу расмий даромад ҳужжатларини тақдим эта олмайдиган, бироқ барқарор даромад манбаига эга бўлган фуқаролар учун ипотека кредитидан фойдаланиш имкониятини яратади.