Ўзбекистонда банкларга аҳоли томонидан жойлаштирилган омонатлар бир йилда 40,2 триллион сўмга кўпайди. Бу ҳақда Марказий банк маълумот берди.

2026 йил 1 май ҳолатига кўра, банклардаги жами депозитлар қолдиғи 444,4 триллион сўмга етган (бир йил аввалгидан 105 триллион сўмга кўп). Шундан 170,2 триллион сўми аҳолига тегишли омонатлар ҳисобланади. Таққослаш учун, бир йил илгари мазкур миқдор 130 триллион сўм эди. Бунда йиллик ўсиш 40,2 триллион сўмни (31 фоиз) ташкил этган.

Омонатларнинг қарийб 96 триллион сўми ёки 56,4 фоизи Тошкент шаҳрида жамланган. Миқдор жиҳатдан кейинги ўринда Хоразм вилояти қайд этилган — 10,3 триллион сўм. Қолган ҳар бир ҳудуддаги аҳоли депозитлари ҳажми 10 триллион сўмдан кам шаклланган. Энг паст миқдордаги маблағлар Сирдарё вилоятидаги банкларга жойланган — 1,4 триллион сўм.

Бугун республикада 34 та банк фаолият юритмоқда. Аҳоли омонатларининг 82,3 триллион сўми давлатга тегишли банкларда жамланган. Бу миқдор бир йил илгари бу рақамдан 25,6 триллион сўмга кўпайган. Омонатларнинг 87,9 триллион сўми хусусий банкларда жамланган. Мазкур миқдор 2025 йил 1 майида 73,2 триллион сўм эди (йиллик ўсиш 14,7 триллион сўм).

Жорий йил 1 май ҳолатига кўра, аҳоли энг кўп омонат маблағларини Kapitalbankка жойлаган — 26,8 триллион сўм. Кейинги ўринларда Агробанк (19,1 триллион сўм), Ўзмиллийбанк (18,1 триллион сўм) қайд этилган.