Ўзбекистонликлар асосан нима мақсадда кредит олмоқда?
Аҳолининг банклардан олган кредитлари ҳажми бир йилда 10,5 трлн сўмга ошди. Ўсишнинг қарийб ярми ипотека кредитлари ҳиссасига тўғри келяпти.
Ўзбекистонда аҳолининг банклар олдидаги қарздорлиги ўсишда давом этмоқда. Марказий банк маълумотларига кўра, 2026 йил 1 май ҳолатида жисмоний шахсларнинг жами кредит қарзи 230,77 триллион сўмга етган.
Бу кўрсаткич 2025 йилнинг шу даврида 220,3 триллион сўмни ташкил этган эди. Шу тариқа, бир йил ичида аҳоли қарздорлиги 10,5 триллион сўмга ошган.
Уй-жой учун кредит
Кредит портфели таркибида ипотека қарзлари энг катта улушни ташкил этган. Ҳозирги кунда аҳоли олган ипотека кредитлари ҳажми 83,9 триллион сўмга тенг.
Бу кўрсаткич ўтган йилнинг мос даврига нисбатан 4,5 триллион сўмга кўпайган. Натижада ипотека кредитлари аҳоли қарздорлигининг энг йирик сегменти бўлиб қолмоқда.
Кейинги эҳтиёжлар
Ипотекадан кейин энг катта йўналишлар микроқарзлар ва микрокредитлар бўлган. Микроқарзлар ҳажми 50,1 триллион сўмга, микрокредитлар эса 44,3 триллион сўмга етган.
Автокредитлар миқдори ҳам юқори бўлиб, 39,6 триллион сўмни ташкил қилган. Бу аҳолининг транспорт воситалари хариди учун банк маблағларига таянаётганини кўрсатади.
Шу билан бирга, таълим кредитлари 6,9 триллион сўм даражасида шаклланган ва ўтган йилга нисбатан деярли ўзгармаган. Истеъмол кредитлари эса 515 миллиард сўмни ташкил этган.
Эслатиб ўтамиз, банк тизимидаги жами кредит портфели 623,3 трлн сўмни ташкил этган. Шундан 289,6 трлн сўми ёки 46,5 фоизи Тошкент шаҳрига тўғри келади.
Шунингдек, апрель ойида мамлакатдаги банкларда муаммоли кредитлар ҳажми 2 трлн сўмга ўсди. Энг катта ўсиш «Миллий банк», «Капиталбанк», «Агробанк» ва «Мадад Инвест банк» ҳиссасига тўғри келди.
Қайси банклар энг паст фоизли ипотека кредитларни таклиф қилмоқда?
Ўзбекистон Марказий банкининг 2026 йил 1 июнь ҳолатига кўра, аҳоли учун ипотека кредитлари бўйича ўртача фоиз ставкасини эълон қилди. Янги ҳафтада ипотека кредитлари бўйича ўртача фоиз ставкаси 22,1 фоизни ташкил этган.
Энг паст ипотека фоиз ставкасини 19,2 фоиз билан «Миллий банк» таклиф қилмоқда. Шунингдек, «Ориэнт Финанс банк»да ипотека кредити 20,0 фоиз, «Алоқабанк»да 20,8 фоиз ва «СҚБ»да 20,9 фоиздан ажратилмоқда. «Ипотека банк» 21,7 фоиз, «Ҳамкорбанк» 21,9 фоиз ставка билан ипотека кредитларини тақдим этмоқда.
