Устун музокара кучига эга компаниялар сони 66 тага етди

Рақобат қўмитаси Ўзбекистонда устун музокара кучига эга корхоналар рўйхатини янгилади. Бундай компаниялар сони 31 тадан 66 тагача ошди. Уларнинг кўпчилиги маиший чиқиндиларни олиб чиқиш соҳасида фаолият юритади, шунингдек темирйўл компаниялари, интернет-провайдер ва суғурта ташкилоти ҳам бор.

Рақобатни ривожлантириш ва истеъмолчилар ҳуқуқларини ҳимоя қилиш қўмитаси устун музокара кучига эга корхоналар рўйхатини кенгайтирди. Бу ҳақда муассаса матбуот хизмати хабар берди. Гап товар бозорида устун мавқега эга бўлмаган, лекин битим шартлари, товарлар сотиладиган ҳудуд ёки нархга бир томонлама таъсир кўрсатиш имконияти мавжуд бўлган корхоналар ҳақида бормоқда.

Биринчи шундай рўйхат жорий йил июль ойида эълон қилинган бўлиб, унга 31 та корхона киритилган эди. Энди эса рўйхат икки баробардан кўпроқ кенгайиб, 11 та соҳада фаолият юритадиган 66 та компанияни ўз ичига олди.

Уларнинг катта қисми — 54 та корхона қаттиқ ва суюқ маиший чиқиндиларни тўплаш ва олиб чиқиб кетиш соҳасида ишлайди ҳамда муайян туман ва маҳаллаларда устун мавқега эга.

Бундан ташқари, рўйхатга 6 та темир йўл линиясини фойдаланишга бериш компанияси киритилган, жумладан Interterminal, Binokor Temir Yo‘l Xizmati, Sharg‘unko‘mir, Termiz Neft Bazasi, Navoiy Temir Yo‘l Transporti ва Сирдарё ИЭС.

2 та компания — Oltiariq gaz to‘ldirish ва Baxtli Sherzod суюлтирилган газ маҳсулотини сақлаш хизмати соҳасида шундай мақомга эга деб топилди.

CityNet Интернет провайдери Index Tashkent савдо мажмуаси ҳудудида устун музокара кучига эга деб топилди. Худди шундай мақомни «Агробанк»нинг маҳаллий филиали томонидан Қорақалпоғистон фермерларига бериладиган кредитларни суғурталашда My Insurance компанияси ҳам олди.

Рўйхатга шунингдек, Olmaliq kon-metallurgiya — иссиқлик энергияси манбаини ишлаб чиқариш ва сотиш соҳасида, Neftgaztadqiqot эса — нефть-газ маҳсулотларининг сифати таҳлили ва назорати соҳасида киритилган.

Қўмита қайд этишича, Тошкент шаҳрида фаолият олиб борувчи автотураргоҳ операторларининг устун музокара кучини эътироф этиш юзасидан тегишли ўрганишлар олиб борилмоқда.

«Рақобат тўғрисида»ги қонуннинг 14-моддасига кўра, устун мавқега эга бўлмаган хўжалик юритувчи субъект ёки шахслар гуруҳи томонидан битим шартлари, товарлар сотиладиган ҳудуд ёки нархга бир томонлама таъсир кўрсатиш имконияти мавжуд бўлса, бундай ҳолат устун музокара кучи деб эътироф этилади.

Koʻrishlar soni: 39