Давлат солиқ қўмитаси умумий овқатланиш соҳаси учун қўшилган қиймат солиғининг (ҚҚС) ноль ставкаси жорий этилиши режалаштирилаётгани ҳақидаги хабарлар юзасидан тушунтириш берди.

Идоранинг қайд этишича, соҳа вакиллари билан ўтказилган учрашувларда бизнесни қўллаб-қувватлашнинг турли усуллари, жумладан, халқаро тажриба ҳам муҳокама қилинган. Хусусан, айрим давлатларда умумий овқатланиш корхоналари учун ҚҚС бўйича имтиёзли шартлар қўлланиши мисол тариқасида келтирилган.

Шу билан бирга, бу каби чоралар, одатда, бизнес томонидан муайян мажбуриятлар — масалан, ходимлар сони, иш ҳақи даражаси ва бошқа ижтимоий-иқтисодий кўрсаткичлар билан бирга амалга оширилади.

«Мазкур масала доирасида фақат хорижий тажрибани ўрганиш ва соҳани қўллаб-қувватлаш бўйича эҳтимолий ёндашувларни кўриб чиқиш ҳақида сўз юритилди. Ҳозирги босқичда умумий овқатланиш соҳаси учун ҚҚСнинг нол ставкаси жорий этилиши бўйича ҳеч қандай якуний қарор қабул қилингани йўқ», — дея таъкидлади Солиқ қўмитаси.

Тадбиркорларга мазкур соҳани қўллаб-қувватлаш юзасидан ўз таклифларини тақдим этиш таклиф қилинди. Ушбу таклифлар ҳар томонлама ўрганилганидан сўнг, бизнес ва давлат манфаатларини инобатга олган ҳолда «энг мақбул қарорлар» ишлаб чиқилади.

Солиқ қўмитаси раиси Фаррух Пўлатов 21 апрель куни бизнес вакиллари билан ўтказилган учрашувда идора халқаро амалиётни, жумладан, Россия тажрибасини ўрганаётганини маълум қилди. Россияда умумий овқатланиш соҳаси учун ҚҚСнинг ноль ставкаси бир қатор шартлар — айланма маблағ, тушум таркиби ва иш ҳақи даражаси бўйича талаблар бажарилганда қўлланади.

Унинг сўзларига кўра, эҳтимолий механизм тадбиркорлар томонидан белгиланган талаблар бажарилган тақдирда, ҚҚСнинг стандарт ва имтиёзли ставкаларидан бирини ихтиёрий равишда танлаш имкониятини назарда тутиши мумкин.

«Агар тадбиркорларнинг кўпчилиги рози бўлса, биз буни жорий этишимиз мумкин… Яъни, икки хил тарифни қўллаш учун қонунчиликка ўзгартириш киритиш мумкин», — деб таъкидлаган эди у.

Ўз навбатида, Солиқ қўмитаси раиси ўринбосари Жаҳонгир Абдиев солиқ имтиёзларини бизнеснинг аниқ мажбуриятлари эвазига тақдим этиш зарурлигини урғулади.

«Ноль даражали ҚҚСни қўллаш учун тадбиркор ўз зиммасига мажбурият олади. У айтадики: “Мен, масалан, 10 млн сўм тушумни таъминлайман ва белгиланган ставкани туширмаган ҳолда 20 нафар ходимга иш ҳақи тўлайман”. Агар бу шартлар бажарилмаса, у бизда [ҚҚСни] 12% тўлайди. Агар бундай ҳолатларда ҳам қўллай олсак ва тадбиркорларимизнинг кўпчилиги бунга рози бўлса, биз буни татбиқ этишимиз мумкин. Яъни, икки хил тарифни қўллаш бўйича қонунчиликка тегишли нормаларни киритиш мумкин», — деди у.