Тадбиркорларга солиқ имтиёзлари Солиқ кодексига киритилгунга қадар улардан фойдаланишга рухсат берилади
Қонуности ҳужжатларида кўзда тутилган солиқ имтиёзлари Солиқ кодексига киритилади. Ўзгаришлар қабул қилингунча Ўзбекистон тадбиркорларига бу имтиёзлардан фойдаланишга рухсат берилади.
Ўзбекистонда илгари қонуности ҳужжатларида назарда тутилган, бироқ Солиқ кодексида акс эттирилмаган солиқ имтиёзларини кодексда мустаҳкамлаш режалаштирилмоқда. Бу ҳақда 5 май куни президент ҳузурида бўлиб ўтган йиғилиш якунида Солиқ қўмитаси департаменти директори Азиз Умирзоқов маълум қилди.
Унинг сўзларига кўра, амалда тадбиркорларнинг қонуности ҳужжатлари (президент фармонлари, қарорлари, ҳукумат ҳужжатлари) билан белгиланган имтиёзлардан фойдаланган ҳолатлари учраган, бироқ бу нормалар Солиқ кодексида йўқлиги сабабли уларнинг қўлланилиши низолар, суд муҳокамалари ва тадбиркорлар учун қўшимча харажатларга сабаб бўлган.
«Бу имтиёзларнинг барчасини Солиқ кодексида акс эттириш тўғрисида қарор қабул қилинди, бироқ солиқ тўловчиларга Солиқ кодексига тегишли ўзгартиришлар киритилгунга қадар ушбу имтиёзлардан фойдаланиш ҳуқуқи берилди», — дея таъкидлади Солиқ қўмитаси вакили «Ўзбекистон 24» телеканалига берган интервьюсида.
Бундан ташқари, йиғилишда касса чекларини бериш устидан жамоатчилик назорати масаласи муҳокама қилинди. Ҳозирда чек берилмагани ҳақида солиқ органларига хабар берган фуқаро ундирилган жариманинг 20 фоизи миқдорида мукофот олиши мумкин.
«Бугунги кунда фуқаро солиқ органларига чек, масалан, касса аппарати чеки берилмагани тўғрисида хабар берса, унга ундирилган жариманинг 20 фоизи миқдорида мукофот пули тўланади», — деди Азиз Умирзоқов.
Унинг қайд этишича, ушбу механизмдан нафақат жамоатчилик назорати, балки даромад манбаи сифатида ҳам фойдаланила бошланган.
«Шуни тан олиш керакки, айрим виждонсиз фуқаролар бундан жамоатчилик назорати воситаси сифатида эмас, балки доимий даромад манбаи сифатида фойдаланиш ҳолатлари кўпайди. Яъни, бир шахс бир ой ичида битта корхона устидан атайин 10 дан ортиқ шикоят йўллаши мумкин эди», — дея қайд этди у.
Солиқ қўмитаси фуқароларнинг қоидабузарликлар ҳақида хабар бериш ҳуқуқини сақлаб қолган ҳолда, мукофот тўлаш сонини чеклашни таклиф қилмоқда. «Янги қоидаларга кўра, солиқ органини қоидабузарликлар тўғрисида хабардор қилиш ҳуқуқи сақланиб қолади. Лекин фуқаро солиқ органларига икки мартадан ортиқ хабар берган тақдирда ҳам, мукофот пули ойига бир мартадан кўп тўланмайди», — деди Умирзоқов.
Бизнес-омбудсман Абдуманноп Бўриевнинг айтишича, икки ҳафта олдин давлат раҳбари тадбиркорлар кайфияти ва ишбилармонлик муҳитига таъсир этувчи муаммоларни тизимли ўрганиш бўйича топшириқ берган. Бу иш якунлари бўйича унинг идораси 15 та тизимли масалани тақдим этган. «Уларнинг ҳар бири батафсил кўриб чиқилди. Аксарият таклифлар қўллаб-қувватлангани сабабли бу тадбиркорларнинг кайфиятига ижобий таъсир кўрсатишини кутмоқдамиз», — деди у.
