Ўзбекистон олти ойдан бери хорижга олтин сотмаяпти Бу ҳақда Миллий статистика қўмитаси маълумотларидан маълум бўлди.
Январь—март ойларида экспорт $5,8 млрдни ташкил этди, бу 2025 йилнинг шу даврига нисбатан 29,3% га кам. Барча етказиб беришларнинг қарийб 40%и хизматларга ($2,32 млрд), кейинги ўринларда саноат товарлари ($1,03 млрд) ва кимё маҳсулотлари ($613 млн) тўғри келди.
Олтин экспортининг тўхтатилиши туфайли савдо балансининг салбий сальдоси (экспорт ва импорт ўртасидаги фарқ) деярли олти баробарга ошди — ўтган йилги $1,12 млрддан $6,4 млрдгача.
2026 йил бошидан буён юқори жаҳон нархларига қарамай (унция учун $4500 дан $5500 гача бўлган оралиқда) олтин экспорти амалга оширилмади. Шу тариқа, Ўзбекистон қимматбаҳо металлни кетма-кет олтинчи ой сотмаяпти. 2025 йилнинг биринчи чорагида олтин сотуви $3,57 млрддан ошган эди.
Ўзбекистон сўнгги марта ўтган йилнинг центабр ойида $1,47 млрдга олтин сотган. 2025 йил якунларига кўра, қимматбаҳо металларни етказиб бериш янги мутлақ рекорд ўрнатди ва $9,9 млрддан ошди.
Навоий кон-металлургия комбинати январь март ойларида 737 минг троя унцияси олтин ишлаб чиқарган, бу ўтган йилги кўрсаткичдан 2,19% га камдир. Шу билан бирга, ишлаб чиқарилган маҳсулотлар қиймати 58,3% га ўсиб, 44 трлн сўмдан ошган.
Март ойида олтин-валюта захиралари ҳажми $8 млрдга камайиб, $68,99 млрдни ташкил қилди ва йил бошидан буён кузатилган деярли барча ўсишни йўққа чиқарди.
Марказий банк омборларидаги олтиннинг қиймати 2023 йил февралидан бери илк бор пасайиб, $60,85 млрдга (-10%) тушди. Айни пайтда, унинг физик ҳажми 9,3 тоннага кўпайиб, 416,76 тоннага (13,4 млн троя унцияси) етди.
Сўнгги олти ой ичида олтиннинг физик захиралари 1,74 млн троя унцияга ёхуд 54,1 тоннага кўпайган.
