Ўзбекистон май ойида олтин экспортини тўхтатди. Бу ҳақда Миллий статистика қўмитаси маълумотларида келтирилган. 2026 йил январь май ойларида Ўзбекистон экспорти $12,6 млрдни ташкил этиб, ўтган йилнинг шу даврига нисбатан 15,5% га камайди.

Бунга асосан олтин экспортининг қисқариши сабаб бўлди. Шу билан бирга, хомашё бўлмаган маҳсулотлар экспортида сезиларли ўсиш кузатилди: хизматлар экспорти 34,9% га ошиб, $4,58 млрдга, саноат маҳсулотлари экспорти эса 18% га ўсиб, $1,9 млрдга етди.

Беш ой давомида олтин экспорти жами $1,5 млрдни ташкил этди. Бу 2025 йилнинг шу давридаги $6,49 млрдга нисбатан қарийб 4,3 баравар кам.

Ўзбекистон апрель ойида олти ойлик танаффусдан сўнг олтин экспортини қайта тиклаган, бироқ май ойида қимматбаҳо металл экспорти яна тўхтатилган.

Бу ҳолат жаҳон бозорида олтин нархининг сезиларли пасайиши билан бир вақтга тўғри келди: июнь ойи бошида бир унция олтин нархи $4500 атрофида бўлган бўлса, ой охирига келиб $4020 гача тушиб, сўнгги бир неча ой ичидаги энг паст даражага етди.

Ўзбекистон апрель ойигача охирги марта 2025 йил центабрида $1,47 млрдлик олтин экспорт қилган эди. 2025 йил якунларига кўра, қимматбаҳо металл экспорти $9,9 млрддан ошиб, тарихдаги энг юқори кўрсаткични қайд этди.

Навоий кон-металлургия комбинати январь март ойларида 737 минг троя унцияси олтин ишлаб чиқарган, бу ўтган йилги кўрсаткичдан 2,19% га камдир. Шу билан бирга, ишлаб чиқарилган маҳсулотлар қиймати 58,3% га ўсиб, 44 трлн сўмдан ошган.

Май ойида Ўзбекистоннинг олтин-валюта захиралари $70,5 млрдни ташкил этди. Бир ой давомида захиралар $307,2 млнга (0,44%) камайиб, март ойидаги кескин пасайишнинг бир қисмини қоплади.

Ўзбекистон Марказий банки омборларидаги олтин қиймати $61,43 млрдгача камайган бўлсада, унинг жисмоний ҳажми 423 тоннагача ошди. Бир ой ичида захиралар қарийб 0,3 млн унция (9,3 тонна)га кўпайди.